Komedie / Drama

Regi: Fernando León de Aranoa

Den elskverdige sjefen (Orig.tit.: El buen patrón)

Med: Javier Bardem, Almudena Amor, Manolo Solo
Kinofilm

Herr Blanco (Bardem) er ein stort sett godt likt leiar. Familieføretaket er ein vektfabrikk. Sjølvgode Blanco tyt støtt om balanse og ser seg sjølv som far for dei tilsette på fabrikken. Han har mang ein konflikt å løyse: ein elendig mellomleiar (Solo) med lang fartstid, ein nysparka arbeidar som protesterer framom porten, og ein lojal gamal kollega med ein ubrukeleg son i ein rasistisk gjeng.

For Blanco er ein ny pris i nær framtid likevel det viktigaste. Men den unge, høge og tynne praktikanten Liliana (Amor) dukkar opp og vekkjer like mykje interesse som problemløysing og prisjakt.

CV-sprik

Den kjende spanske regissøren Fernando León de Aranoa har laga hummar og kanari. Han likar å knyte både drama og komikk til røynda. Mandager i solen (2002) minnest eg som ei meisterleg varm skildring av arbeidslause i Galicia. A Perfect Day (2015) var underhaldande og gripande om bistandsarbeid på Balkan på 1990-talet. Loving Pablo (2017) var eit meiningslaust mageplask om Pablo Escobar.

Den elskverdige sjefen er eit solid steg opp igjen. Likevel er eg skuffa. Seks Goya-prisar er i meste laget, sjølv om filmen har fleire element som kan fengje, og er godt handverk.

Lagom levering

Klippen er velsmurd. Filmen driv. Mange liv er fletta pertentleg saman. Javier Bardem er slett ikkje verst i hovudrolla. Det er han vel aldri. Her irriterer han nett som han skal med mild og nedlatande tone. Ei lang rolleliste har mange dyktige folk som leverer. Nokre figurar er friskare enn andre. Vektaren med sans for rim er bra. Den roleg framstormande og drivande dyktige arabiske logistikkleiaren med dametekke fungerer flott.

Lina mellom kritikken av dei sleske sidene hjå sjefen og fantasiane til regissøren sjølv er kort. Kameravinklane frå den eldre herren er ikkje originale. Kritikken av korleis arva rikdom tilpassar seg ei meir kompleks verd, er snedigare og tar opp i seg mange skuggesider ved det moderne Spania.

León de Aranoa har freista laga ein intelligent komedie. Diverre ler eg sjeldan. Trass i eit samanvove nett av konfliktar og ambisjonar kjennest det heller ikkje som om Den elskverdige sjefen er så smart i samfunns­kritikken som han stundom aspirerer til. Kanskje er det stengt, men eg hadde håpa på meir.

Håkon Tveit

Håkon Tveit er lektor i latinamerikansk kultur og historie ved Universitetet i Bergen og fast filmmeldar i Dag og Tid.