Dokumentarfilm

Regi: Håvard Bustnes

Trond Giske – Makta rår

Med: Trond Giske, Tone Sofie Aglen, Sunniva Andreassen
Kinofilm

Etter sjarmerande Opprørske oldemødre og imponerande Hatets vugge er dokumentarfilmskaparen Håvard Bustnes heime igjen. Han har følgt Trond Giske på signingsferd året etter at dei første varsla kom mot politikaren.

Humpete tur

Filmen er ein berg-og-dal-bane der saka stadig tek nye vendingar. Samtalar i bilen er prega av at Giske set grenser. Han vil ikkje snakke om den sentrale saka. At dei to knapt vil vere i lag, gjev ei spent stemning som snakkar om debattklima i større skala.

Bustnes vil vise publikum at han er uroleg for å vere eit talerøyr for reisefølget. Tydelege forklaringar av forteljarstemma i tillegg til synlege mikrofonar og kamera skaper avstand. Utstyret kommenterer òg at politikken er sett i scene. Klipp og struktur viser at regissøren tek seksuell trakassering på alvor.

Hell Amfi

Det gjer ikkje Giske. Og han er ikkje åleine. På kjøpesenter etter kjøpesenter frå Hell til Honningsvåg er støtta heilhjarta frå den eldre garden. Dei er mange som ikkje forstår maktbruk og overtramp. Det må nye stemmer til for å avsløre infernalsk dynamikk.

Scena der heile Trøndelag AUF marsjerer ut av årsmøtet i protest, grip, i likskap med vitnesbyrda frå varslarar. Ei mengd relevante politiske kommentatorar og journalistar kjem med god innsikt og oversikt.

Visuelt er filmen vanleg, med intervju og klipp frå nyhende. Breidda, perspektiva og ein reflektert regissør gjer at Trond Giske – Makta rår ikkje berre er ein ny episode av Vårt lille land, men eit solid samandrag av ei sak som seier mykje om politikk her til lands.

Håkon Tveit

Håkon Tveit er lektor i latinamerikansk kultur og historie ved Universitetet i Bergen og fast filmmeldar i Dag og Tid.