Videosjappene døydde for nokre år sidan, utan teikn til virus. Sjølv om ein ikkje får slå av ein prat med greie tilsette, kan du framleis leige ein film du gjekk glipp av på kino for eit halvt år sidan for under ein femtilapp. SF Anytime, Blockbuster, YouTube og Google Play er opne døgnet rundt. Alle har Håp i «hylla» si. Denne fokuserte og forrykande sterke filmen av Maria Sødahl er eit engasjerande studium i korleis sjukdom kan prege ein familie. Einar Økland gjer sin debut som filmskodespelar og vitnar om eit talent eg vonar vi får sjå meir på film framover, etter at han fylte åtti år i år. Økland har selskap med alltid solide Stellan Skarsgård, men båe hamnar i skuggen av ei kraftfull hovudrolle av Andrea Bræin Hovig.

Biblioteket

Andrea Bræin Hovig har blitt ein institusjon i seg sjølv. Ho er kanskje den beste skodespelaren vi har no. Du finn henne òg på filmsida til biblioteka, sjølv om dei har stengt lokala sine. Filmbib.no har ei lang liste av filmar du kan sjå med lånekort, spesielt norske kortfilmar og dokumentarar. Der kan du sjå ein film som berre inneber at Andrea Bræin Hovig snakkar til kamera. Det gjer ho så klart med bravur. Det er meg du vil ha er ein glitrande film. Om skodespelaren er einaren i norsk film no, er filmskapar Dag Johan Haugerud definitivt med i dragkampen om å vere fremst blant regissørane våre. Etter denne friske og stramme saka tok det fem år før vi fekk meisterlege Barn i fjor, tett følgd av finfine Lyset fra sjokoladefabrikken i år.

Journalistikken

Haugerud kan å gå i djupna. Det vil vonleg aviser òg halde fram med mellom koronaklikk. VGTV verkar å ha sett at dokumentarfilmen kan vere ei effektiv form for djupnejournalistikk. No får du nokre knallgode filmar gratis utan abonnement, men katalogen deira er verd ein slant. One Child Nation av Jialing Zhang og Nanfu Wang er reint gull. Sistnemnde har blitt ei global stjerne på dokumentarhimmelen. Denne filmen frå i fjor er ei grundig, respektfull, sjokkerande, lærerik og rørande skildring av eittbarnspolitikken i heimlandet hennar, Kina. Filmen er djup på fleire vis. Arbeidet til filmskaparane er imponerande. Slikt pungar ein ut for med glede.

Håkon Tveit

Håkon Tveit er lektor i latinamerikansk kultur og historie ved Universitetet i Bergen og fast filmmeldar i Dag og Tid.