Animasjon / familiefilm

Regi: Peter Sohn

Elemental

Med: Leah Lewis, Mamoudou Athie, Ronnie Del Carmen
Kinofilm

Ember (Lewis) kjem frå ein eldfamilie som kom til Element City som migrantar. Faren Bernie (Del Carmen) driv ei sjappe som sel mat frå heimlandet. Ember skal ta over når ho er klar. Vassfolk i sentrum ser ned på eldinnvandrarane. Skepsisen er gjensidig.

Folk av jord og luft er med på å gje ein blanda by. Ein dag renn vassbyråkraten Wade Ripple (Athie) inn i kjellaren til familiebutikken. Han og Ember kranglar. Han er vatn. Ho er eld. Wade blir blaut om hjarterota, og det slår gneistar mellom dei to. Det byrjar med plask og endar med bleievask.

Størst er kjærleiken

Elemental fløymer over av slik språkleik. Ein lyt konsentrere seg for å få med alle vitsane om vatn, eld, jord og luft. Eg smiler godt rett som det er. Animasjonane er uttrykksfulle. Det flakkande og bøyelege i flamme- og vassfolk gjev liv. Samspelet mellom elementa er artig. Slapstick står sentralt. Regissøren Peter Sohn viste at han kan dette med morosame Den gode dinosaur.

Byen er full av fantasifulle konstruksjonar. Han liknar ein ljos og fargerik versjon av New York. Det animerte universet er innfallsrikt på line med Gotham til Batman, ein dyster storebror frå superheltverda. Wade ser at bymiljøetaten ikkje har ting på stell i utkantstrøka der Ember og familien held til. Ulikskapen er ein avgrunn. Kan kjærleiken vinne over motsetningane mellom elementa?

Ver vatn

I essens er Elemental ei klassisk kjærleikshistorie. Filmen flyt mellom tidlaus og føreseieleg. Forteljinga går inn i ein tradisjon i USA i slekt med Gjett hvem som kommer til middag frå 1967. Like mykje høyrer han heime med nyare filmar som Minari, The Farewell og Everything Everywhere All at Once, tre store suksessar frå USA med asiatiske perspektiv.

Filmskaparen Sohn vaks opp i New York i ein koreansk familie. Han kjenner spelet med forventingar frå familie og diskriminering frå majoriteten. Elemental speglar båe, sjølv om foreldra til Ember er arketypiske. Den liberale overklassefamilien til Wade er tatt på kornet.

Sohn er ein firmamann hjå Pixar med lang fartstid som både stemmeskodespelar og animatør. Selskapet har levert ei lang rekke med massive, originale suksessar. Blant dei elleve Oscar-vinnarane deira finn vi filmar som Oppdrag Nemo, WALL-E, Se opp og Coco.

I fjor viste studioet at dei framleis har teften med herlege Rød av Domee Shi. Elemental går inn i rekka av populære filmar for heile familien. Folk kjem til å kose seg på kino.

Håkon Tveit

Håkon Tveit er lektor i latinamerikansk kultur og historie ved Universitetet i Bergen og fast filmmeldar i Dag og Tid.