Film
2022 i kinosalen
Sjølv med intens konkurranse om strøymekundane vil dei beste filmane enno fyrst ha premiere på stort lerret. Dag og Tid-filmmeldarane er berre til dels samde om kva filmar som toppa lista i året som gjekk.
Eg kan knapt minnast filmar som er så frie i handsaminga av sjangerkonvensjonar som Everything Everywhere All at Once av Daniel Kwan og Daniel Scheinert.
Foto: Another World Entertainment
Verda er full av god film. Dei beste filmopplevingane i 2022 kom frå mange land. Eitt skil seg likevel ut. Eg kunne lett ha tatt med fire filmar frå Iran på lista mi. Det blir med to, og heiderleg omtale til Asghar Farhadi og Ali Abbasi.
Kvinne
For ein kar utan interesse for kongehus er Spencer av Pablo Larraín ei overrasking på lista. Chilenaren er alltid knallsterk på form. Den frie fiksjonen om den siste jula prinsesse Diana hadde med kongefamilien, er eit skarpt portrett. Ein annan favoritt, Jonas Carpignano, fullbyrda trilogien sin frå Calabria med Chiara, ei medrivande skildring av dottera til ein mafioso lågt på rangstigen.
Ei ny stemme er den kurdiske debutanten Kurdwin Ayub frå Austerrike. Bak sløret er ei nydeleg forteljing om ei tenåringsjente, full av nye perspektiv, friske figurar, ungdommeleg stil, liv og sjarm. Maryam Moqadam og Behtash Sanaeeha leverte eit klassisk iransk drama som tok pusten frå meg i Uten skyld, om ei kvinne som finn ut at mannen blei feilaktig avretta.
Liv
Meir Iran. Panah Panahi er sonen til den fengsla legenda Jafar. Hans debut, Veien videre, osar av sjarm, humor og livsvilje, trass i mørke skuggar. Det står heller ikkje på talent eller humør i hjartevarme Ali & Ava av britiske Clio Barnard. Sjeldan såg ein så mykje kjærleik og von i film om livet i Bradford.
Digital tilgang – heilt utan binding
Prøv ein månad for kr 49.
Deretter kr 199 per månad. Stopp når du vil.
