Film
Fagre er fjella og foreldra
Margreth Olin hyllar naturen i Nordfjord, faren og slekta i vakre bilete.
Margreth Olin har med seg den 85 år gamle far sin som guide i Oldedalen i Nordfjord.
Foto: Lars Erlend Tubaas Øymo / Speranza / Norsk Film Distribusjon
Den røynde dokumentarfilmskaparen Margreth Olin vender heim til foreldra for å følgje i fotspora til faren, Jørgen Mykløen. Åttifireåringen går flittig på tur i dei spektakulære fjella som omkransar Olderdalen i Nordfjord. Slik vonar han at han skal halde tritt med den ni år yngre kona si, Magnhild. Samtalane deira heime i stova og turane hans er rammene for ein ode til naturen.
Heimstaddiktet
Å sjå fjellheimen, fossane, breane og den grøne dalen i kinosalen er overveldande. Med BBC på laget får vi kjekke bilete av røyskatt, ugle, revebjølle, ørn, humle, elg, blåklokke, hjort og fjordingar. Naturen kler stort lerret. Det knakar i breen. Dei brusande fossane slår mot svarte knausar der eirgrøn mose trivst. Eg blir tyrst av å sjå Jørgen stikke handa i ein bekk med friskt fjellvatn.
Olin vekslar mellom skor i breen og den ru strukturen i hendene til far sin. Det er nesten som kameraet kjem borti huda. Ho legg fram visuelle argument for at vi høyrer til naturen. Det er ikkje ein turistbuss å sjå på veg til Briksdalsbreen. Berre ein kort visitt til nabodalen og Lodalsulukka i 1905 og eit par arkivfoto bryt forteljingane og turane.
Hugnaden til heimtraktene er sterk. Med ein god dose nostalgi knytt til slike landskap er ein godt budd til å nyte bileta. For andre sit nok fort filmen i vranghalsen på grunn av overdosen med nasjonalromantikk. Men dei som har sett De andre (2012) om mindreårige asylsøkjarar, veit at Olin ikkje er nokon nasjonalist.
Fjellfolk
Digital tilgang – heilt utan binding
Prøv ein månad for kr 49.
Deretter kr 199 per månad. Stopp når du vil.
