Teikneseriebok

Ole Mathismoen og Jenny Jordahl (ill.):

Hva er greia med klima?

Ena forlag

Den norske barneboka vender seg utover. Lenge har tendensen vore ei orientering mot individet og det subjektive, no kjem eit skifte: Barnelitteraturen tek tak i problema samfunnet står overfor. Hva er greia med klima? skriv seg inn i fleire trendar. Også som sjanger er fagboka i front i utviklinga av barnelitteraturen i Skandinavia.

Teikneserieboka til Jenny Jordahl og Ole Mathismoen kan lesast som ein oppfylgjar til fjorårets suksess Grønne greier. Ho er smidd over same lest, men ho er ikkje like vellukka.

I rolla som seg sjølv stiller Jenny spørsmål på vegner av oss alle; «Hæ? Jeg er jo bare lille meg. Det spiller ingen rolle hva jeg gjør eller ikke gjør.» Forskaren Ole svarar: «Hvis alle tenker at ’jeg gjør litt’ blir det mye til sammen. Da kan vi klare det.»

Diverre forsvinn dette konstruktive perspektivet fort. Rett nok reiser dei to rundt i ei klimanøytral «evighetsmaskin», ein slags moderne variant av luftskipet til Umberto Nobile. «Naut» minner også om farkosten til Oskeladden, med eventyrlege eigenskapar. Difor står det ikkje klart nok fram som ein tryggande sjanse og løysing, sjølv om det kan ha vore intensjonen.

Den nedslåande reisa går gjennom flaum, brann og forureining. Nokre kvileskjer finst i oppslag som forklarer klimafaglege omgrep, men kva kan «lille meg» eigentleg bidra med? I «Grønnebyen» har innbyggarane tatt grep. Skissa av den miljøvenlege byen svarer likevel ikkje på spørsmålet frå opningssidene, til det er vinklinga for kollektiv.

Janne Karin Støylen

Janne Karin Støylen er bonde og litteraturvitar.