Teikneserie

Bjørn Ingvaldsen og Kristoffer Kjølberg (ill.):

Antifestkomiteen

Gyldendal

I Bjørn Ingvaldsens mest omtykte barnebøker skriv han gjerne frå eit liknande landskap som i diktsamlinga meldt ovanfor. Saman med teikneserieskaparen Kristoffer Kjølberg gjev han seg no i kast med meir kvardagslege traume som kan ramme alle. I det første albumet i den nye serien om drittungane dreier det seg om å ikkje bli invitert i bursdag til den mest populære jenta i klassen.

Alle er inviterte, så nær som drittungane. Dei fire som er ekskluderte, slår seg saman og planlegg ein herleg hemn. Med kvar sin klare styrke er dei eit godt lag. I ein enkel strek som er lett å kjenne att, understrekar Kjølberg typeteikningane. Kontrastane og samspelet gjev framdrift og snert i forteljinga.

Bakgrunnsfargen skiftar med scenene og fortel kvar vi er. Legg du ikkje merke til det før, ser du det når dei fantastiske fire strenar inn på det gusjegrøne sjukehuset.

Når fleire generasjonar etter kvart kjem inn på scena, skriv Ingvaldsen fram eit samansurium av morosame misforståingar og tøysete tvistar. Floken veks, men løyser seg lett likevel. Enden er god og moralen like så.

Janne Karin Støylen