Roman

Torvald Sund:

Eva

Communicato forlag

Torvald Sund er nærast å rekne som ein institusjon i Trøndelag, med eit omfattande forfattarskap innanfor barne- og ungdomsbøker, teaterstykke og spel, romanar og noveller, og ei einsleg diktsamling frå debutåret i 1979. Alt i alt kan han vise til rundt 50 titlar. Barne- og ungdomsbøker veg tyngst på lista, Eva er den fjerde romanen.

Forteljeglede og folkeleg, barsk humor er typisk for Sund, og sjølv om han snikrar med relativt grove materialar, reiser han likevel byggverk som lesaren trivst i, og denne trivselen har med språkføringa og personteikninga å gjere saman med den solidariteten han viser til dei som fell utanfor i skole eller arbeidsliv.

Denne gongen er det Haldor Purkvika frå Innherred, ungkar og heimføding i 40-åra, ikkje den skarpaste kniven i skuffen, ikkje den som slår tilbake, men heller ein som trekker seg unna og søker trøyst i naturen eller i kuleringen. Han vil at alt skal vere slik det var i barndommen på 1960- og 1970-talet, mens foreldra levde, den gongen Ivar Simastuen var toppen av underhaldning og Bjørn Bang Andersen tok medalje i kulestøyt i alle noregsmeisterskap mellom 1960 og 1982. No er det blitt 2004. Alt har stått stille i Purkvika, inga framdrift, inga oppdrift, inga drift å snakke om i det heile tatt. Likevel er Purkvika sjølve paradiset for Haldor.

Så dukkar oppkomlingen og eigedomsspekulanten Sten Ruben Larsstu opp, og på kort tid lurer han Haldor til å selje tolv hyttetomter for seks millionar, der det meste er under bordet og betalt i kontantar, noko Haldor slit med, for kor skal han gøyme så mykje pengar utan at nokon kan finne ut av det?

Pengar luktar ikkje, heiter det, men lukta av pengar i Purkvika blir så sterk at ein dag dukkar Eva Adamsberg (!) opp og gjer seg lekker. Haldor har aldri vore nær ei jente, og no blir han lurt enda ein gong, for Eva og Gudleik, fienden frå barneskolen, stel alle millionane for deretter å kjøpe Purkvika på tvangsauksjon med store planar om turisme, rorbuer, bar og karaoke.

Handlinga drar seg etter kvart mot ei spektakulær krimhistorie der Haldor får den hemnen han søker, utan å bli tatt, for både Eva og Gudleik døyr i ei ulukke Haldor fint kunne ha hindra dersom han hadde ønskt det.

Det er både drama og melodrama hos Torvald Sund, og ikkje alt er like truverdig; det går litt fort i svingane her og der, men dei historiene han fortel, er underhaldande og poengterte, framført i eit dialektfarga nynorsk og med karikaturen som ein viktig del av personteikninga.

Ei triveleg stund med Torvald Sund.

Oddmund Hagen

Oddmund Hagen er forfattar og fast bokmeldar i Dag og Tid.