Roman

Lars Mytting:

Hekneveven

Gyldendal

Lars Mytting starta det storslåtte historiske eposet frå Gudbrandsdalen med Søsterklokkene i 2018. No er Hekneveven på plass, og enda skal det komme ein tredje roman før alt er i mål. Handlinga startar i 1880, årets bok går fram til 1919, og i heile denne perioden er Kai Schweigaard prest på Butangen, ei fiktiv bygd i nærleiken av Fåvang.

Som prest kjem han tett innpå bygdefolket, og han blir særleg opptatt av eldre tider, overlevert tradisjonsstoff og segner kring søsterklokkene i den gamle stavkyrkja, i Hekneveven etter dei samanvaksne tvillingane Gunhild og Hallfrid Hekne, som levde først på 1600-talet og opplevde Kringen-slaget i 1612. Men stavkyrkja er borte, søsterklokkene er skilde, ei er i Dresden, den andre på botnen av Løsnesvatnet i Butangen, og Hekneveven har vore borte sidan 1813. Det er ein versjon av jakta på den heilage gralen Mytting tematiserer i desse romanane, og han gjer det på imponerande vis ved å flytte den magiske realismen og skjebneforteljinga inn i den historiske romanen.

Skjebnen

Hekneveven er bygd opp kring tvillingbrørne Jehans Hekne og Victor Harrison, skilde ved fødselen samtidig som mora Astrid Hekne døyr i barsel i 1881. Når dei igjen treffest i 1903, er det tilfeldig, slik mykje i desse romanane verkar tilfeldig samtidig som det er underlagt ein større plan: skjebnen. Alt som er skilt, vender tilbake til der det høyrer heime, på Butangen, og Mytting imponerer ved å skru dette saman på ein måte som lesaren godtar og finn logisk innanfor dei materielle og kulturelle rammene han legg som føring for livsløpa han følgjer.

Samtidig viser han som alltid stor kunnskap og innsikt i gamle driftsformer og gammalt handverk og i moderne grep som blant anna gir elektrisk straum til bygda, og det siste er det Jehans Hekne som står bak. Jehans veks opp under tronge kår hos fosterforeldre, men han fyller Oskeladdens rolle i forteljinga ved at han vinn både «prinsessa og halve kongeriket». Han kjem seg opp og fram saman med den driftige Kristine, og etter kvart sit han som herre på Hekne etter å ha spelt den innfule og forstokka onkelen Osvald Hekne ut over sidelinja.

Fleire livsløp

Men det er fleire livsløp å følgje, både i og utanfor bygda, og den som fyller plass ved sida av Jehans, er tvillingbroren Victor, som veks opp hos rike fosterforeldre i Skottland, og som har eit band til Noreg og Butangen gjennom ei norsk guvernante. Slik blir den store og den vesle verda vovne saman i episodar og oppslag kring det som er felles for dei to brørne, og den som fører skyttelen fram og tilbake og formar eit mønster, er Kai Schweigaard som aldri sviktar sin misjon: å heidre minnet til Astrid Hekne, den store kjærleiken i livet hans.

Lars Mytting leverer stor forteljekunst i desse romanane, og sjølv om det her og der tippar over i det triviallitterære, greier han heile vegen å balansere mellom ein robust realisme og ein skillingsviseaktig sentimentalitet som alltid finst i folkedjupet. Det er godt gjort, og eg ser fram til avslutninga av trilogien.

Oddmund Hagen

Oddmund Hagen er forfattar og fast bokmeldar i Dag og Tid.