Adventsbok

Gaute Heivoll og Børge Bredenbekk (ill.):

Klokkerens
evangelium

Vigmostad Bjørke

Klokkerens evangelium av Gaute Heivoll er illustrert av Børge Bredenbekk. Illustrasjonane er med på å skape det særpreget som gjer at boka skil seg ut og står fram som den mest originale og modige adventsboka i år. Svartkvite poetiske landskap og portrett understrekar kjensla av draum – og død.

Boka står i slektsskap med ikkje berre fjorårets adventssuksess Snøsøsteren, men ein annan bestseljar frå 2018: Søsterklokkene» av Lars Mytting: I ei bygd ein gong i gamle dagar, skal kyrkja rivast og seljast. Auksjonen er opprivande for Bendik. No mistar han alle band til den døde faren. Han var klokkar i kyrkja.

Forteljinga kan lesast og tolkast på mange måtar. Draumkvedet syng med om ein kjenner kvadet. Lesaren i målgruppa gjer nok ikkje det. Kravet til å kunne tolke og forstå er både ein styrke og ein veikskap ved boka, ho er kort sagt ikkje for alle.

Den klaraste bodskapen dreier seg om lesinga som gåve. Bendik drøymer om bokstavar og bøker, om å forstå for å kunne fullføre historia faren ikkje rakk å lese ferdig for han. Klokkerens evangelium byr fram lesegleda i julegåve, men berre til dei som har fått henne før.

Janne Karin Støylen