Kjærleikens flo og fjære
Minnet er både ven og fiende i Prousts stilleflytande prosa.
Marcel Proust (1871–1922) fotografert i 1895.
Roman
Marcel Proust:
Swanns kjærleik
Omsett av Margunn Vikingstad
Skald Forlag
Kven er du på utsida, den sida andre meiner dei ser, og kven er du på innsida, den berre du ser? Truleg er skilnaden større enn du har tenkt deg, og endå mykje større enn dei andre har tenkt seg, om dei i det heile har tenkt over saka. For dei har vel nok med sitt, dei også. Slike ting kjem eg i tankar om under lesinga av Swanns kjærleik, ein roman i den store romanen På sporet av den tapte tid av Marcel Proust.
Fransk overklasse
Swanns kjærleik er ei nyomsetjing i klassikarserien frå Skald, og nok ein gong eit litterært høgdepunkt. Det kjem ikkje av handlinga i boka, men måten ho er skriven på, den grundige granskinga av menneskesinnet som truleg berre fiksjonen kan gje oss, og då særleg når han ser ut som noko faktisk.
Proust skriv om hendingar i sosietetslivet i Frankrike, truleg i 1880-åra (teksten nemner ein president Grévy, og han regjerte i tidsrommet 1879 til 1887), då ein velståande herremann, Charles Swann, forelska seg i Odette de Crécy, ei ung dame som, syner det seg etter kvart, har intim omgang med ein heil del andre menn, og nokre kvinner også. Alt dette er usynleg for Swann i byrjinga, då han er i hyppige selskap hjå ekteparet Verdurin, som roser seg av å samla fargerike personar i krinsen sin, der få gjer noko nyttig, men alle skriv brev heile tida, og personar kan falla inn i og ut av nåde utan konkret årsak.
Swann tykkjer ikkje så mykje om Odette i byrjinga, men eitt eller anna ved henne grip han, og snart krinsar tankane hans om Odette og lite anna. Han er så å seie fanga av gravitasjonen hennar, men denne tilstanden er ikkje stabil. Opp over øyra forelska som han er, vil han også ha ho heilt for seg sjølv, men det er ikkje mogleg, og snart vert han gripen av sjalusi.
Kvernande tankar
Vekslingane i sinnet hans, kjærleikens flo og fjære, er skildra eminent av Proust, han tek seg tid til å skrive ut lange scener i tankane til Swann, der det ufriviljuge minnet tidt er å sjå, det som ovrar seg etter ei sansing, slik Proust også opna minnet for heile storverket sitt ved smaken av ei madeleinekake.
Hjå Swann er det ein frase i eit musikkstykke som er eit «sesam, sesam» for minneporten, og for den som tek seg tid til å lesa seint og grundig, er det mykje ein kan kjenna seg att i når det gjeld tankane til Swann, til dømes måten dei kvernar på nokre elles uviktige ord andre har sagt, og aldri vert ferdige med å leita etter løynde synder attom uskuldige gestar. I tanken, og særleg mistanken, brukar han så å seie Odette opp, og når ho, truleg utan å forstå det sjølv, stadfestar det han mistenkjer, vert det endå verre for Swann.
Det er altså interessant lesnad, men ikkje just underhaldande. Og somme parti av boka er på nokre plan keisame. Her er det lange replikkvekslingar som ikkje er anna enn sosietetssladder frå byrjinga av det førre hundreåret, og ei oppstilling av aristokratar og andre privilegerte som ikkje vedkjem lesaren i det heile. Men også her er Proust dyktig til å skildra folk frå fleire sider, sjølv om nokre av personane kan verka karikerte, mellom dei ein doktor Cottard, som stort sett konverserer ved hjelp av malplasserte ordspel, og andre som i kvar setning må syne fram relasjonen dei har til ein eller annan selebritet. Men prosaen flyt fint og stille i ei omsetjing Margunn Vikingstad kan vera stolt over.
Odd W. Surén
Odd W. Surén er forfattar og fast bokmeldar i Dag og Tid.
Er du abonnent? Logg på her for å lese vidare.
Digital tilgang til DAG OG TID – heilt utan binding
Prøv ein månad for kr 49.
Deretter kr 199 per månad. Stopp når du vil.
Roman
Marcel Proust:
Swanns kjærleik
Omsett av Margunn Vikingstad
Skald Forlag
Kven er du på utsida, den sida andre meiner dei ser, og kven er du på innsida, den berre du ser? Truleg er skilnaden større enn du har tenkt deg, og endå mykje større enn dei andre har tenkt seg, om dei i det heile har tenkt over saka. For dei har vel nok med sitt, dei også. Slike ting kjem eg i tankar om under lesinga av Swanns kjærleik, ein roman i den store romanen På sporet av den tapte tid av Marcel Proust.
Fransk overklasse
Swanns kjærleik er ei nyomsetjing i klassikarserien frå Skald, og nok ein gong eit litterært høgdepunkt. Det kjem ikkje av handlinga i boka, men måten ho er skriven på, den grundige granskinga av menneskesinnet som truleg berre fiksjonen kan gje oss, og då særleg når han ser ut som noko faktisk.
Proust skriv om hendingar i sosietetslivet i Frankrike, truleg i 1880-åra (teksten nemner ein president Grévy, og han regjerte i tidsrommet 1879 til 1887), då ein velståande herremann, Charles Swann, forelska seg i Odette de Crécy, ei ung dame som, syner det seg etter kvart, har intim omgang med ein heil del andre menn, og nokre kvinner også. Alt dette er usynleg for Swann i byrjinga, då han er i hyppige selskap hjå ekteparet Verdurin, som roser seg av å samla fargerike personar i krinsen sin, der få gjer noko nyttig, men alle skriv brev heile tida, og personar kan falla inn i og ut av nåde utan konkret årsak.
Swann tykkjer ikkje så mykje om Odette i byrjinga, men eitt eller anna ved henne grip han, og snart krinsar tankane hans om Odette og lite anna. Han er så å seie fanga av gravitasjonen hennar, men denne tilstanden er ikkje stabil. Opp over øyra forelska som han er, vil han også ha ho heilt for seg sjølv, men det er ikkje mogleg, og snart vert han gripen av sjalusi.
Kvernande tankar
Vekslingane i sinnet hans, kjærleikens flo og fjære, er skildra eminent av Proust, han tek seg tid til å skrive ut lange scener i tankane til Swann, der det ufriviljuge minnet tidt er å sjå, det som ovrar seg etter ei sansing, slik Proust også opna minnet for heile storverket sitt ved smaken av ei madeleinekake.
Hjå Swann er det ein frase i eit musikkstykke som er eit «sesam, sesam» for minneporten, og for den som tek seg tid til å lesa seint og grundig, er det mykje ein kan kjenna seg att i når det gjeld tankane til Swann, til dømes måten dei kvernar på nokre elles uviktige ord andre har sagt, og aldri vert ferdige med å leita etter løynde synder attom uskuldige gestar. I tanken, og særleg mistanken, brukar han så å seie Odette opp, og når ho, truleg utan å forstå det sjølv, stadfestar det han mistenkjer, vert det endå verre for Swann.
Det er altså interessant lesnad, men ikkje just underhaldande. Og somme parti av boka er på nokre plan keisame. Her er det lange replikkvekslingar som ikkje er anna enn sosietetssladder frå byrjinga av det førre hundreåret, og ei oppstilling av aristokratar og andre privilegerte som ikkje vedkjem lesaren i det heile. Men også her er Proust dyktig til å skildra folk frå fleire sider, sjølv om nokre av personane kan verka karikerte, mellom dei ein doktor Cottard, som stort sett konverserer ved hjelp av malplasserte ordspel, og andre som i kvar setning må syne fram relasjonen dei har til ein eller annan selebritet. Men prosaen flyt fint og stille i ei omsetjing Margunn Vikingstad kan vera stolt over.
Odd W. Surén
Odd W. Surén er forfattar og fast bokmeldar i Dag og Tid.
Fleire artiklar
Det oppstår misvisande biletet av at covid-19 forårsakar Alzheimer, meiner Preben Aavitsland ve FHI.
Foto: Erik Johansen / NTB
Meir om seinfølgjer
Den årlege rapporten FHI har publisert, syner at dødeligheita blant personar under 40 år har vore nokså stabil sidan 2015.
Gukesh kan verta den klart yngste verdsmeisteren i historia. Carlsen var nesten fem år eldre då han vann kandidatturneringa og vart verdsmeister i 2013.
Foto: Maria Jemeljanova / Fide
«Sjølv har eg heller aldri sett ein så mogen 17-åring, korkje på eller utanfor sjakkbrettet.»
Line Eldring har leidd utvalet som tilrår at Noreg både bør vidareføre og utvide samarbeidet med EU på nye område framover. Ho la nyleg fram utgreiinga «Norge og EØS: Utviklinger og erfaringer» for utanriksminister Espen Barth Eide.
Foto: Terje Pedersen / NTB
Veksande fjernstyre
Tilknytinga vår til EU veks og veks, både gjennom EØS-avtalen og utanfor, ifølgje ei ny utgreiing. Og det er få som kjenner heilskapen.
Kina fyrer på alle sylindrane: Ingen bygger ut så mykje kolkraft som kinesarane gjer. Biletet viser eit kolkraftverk i Dingzhou i Hebei-provinsen.
Foto: Ng Han Guan / AP / NTB
Ein straum av problem
Straumforbruket i verda aukar framleis raskare enn fornybar kraftproduksjon. Kolkraftverk skal varme kloden i mange år enno.
Ludmila Shabelnyk syner bilete av sonen Ivan i landsbyen Kapitolivka ved Izium i Ukraina, 25. september 2022. Russiske okkupasjonsstyrkar mishandla Ivan grovt før dei drap han. Landsbyen vart seinare gjenerobra av ukrainske styrkar.
Foto: Evgeniy Maloletka / AP / NTB
Overgrep som skakar folkeretten
Okkupasjonsmakta Russland viser ingen respekt for konvensjonen som skal verne sivile i krig.