Biletbok

Kari Stai:

Jakob og Neikob. Stormen

Det Norske Samlaget

Her er dei igjen, radarparet Jakob og Neikob, i si sjette bok. Denne gongen insisterer Kari Stai meir på bodskapen sin enn i dei tidlegare bøkene. Vi ser det allereie på tittelbladet, der dedikasjonen til Greta Thunberg står øvst på sida.

Tidleg i forteljinga møter dei to venene på Spinnvill, som kan lage alt mogleg på fabrikken sin.

– Berre sei frå kva de manglar, i morgon også, seier Spinnvill når dei dreg heim frå fabrikken med bilar fulle av alt mogleg i kveldinga.

I oppslaget ser vi ein lang kø med rosa bilar fulle av godteriliknande greier i kunstige fargar stable seg opp bakken.

Nyttar kontrastane

Ei god barnebok gjev lesaren ei oppleving med det same og ei røynsle som varer.

Kari Stai utnyttar kontrastane og lukkast med begge deler. Jakobs ja sørgjer for å få historia til å setje fart og utfordringane til å vise seg. Neikobs nei peikar på tolkingsrom, opnar språket og koplar på ettertanken. Dialogen mellom dei to gjer at utvalde ord kan få ny tyding for lesaren, ei tyding som kan skape undring og refleksjon. Slik er det når Stai snur og vender på omgrepet «ingenting» – som viser seg å vere ein veldig viktig ting.

Noko på hjartet

I alle bøkene er botnlinja den same: Det er vel og bra å kunne seie ja, men langt viktigare å kunne seie nei.

Sjølv om miljøbodskapar knytte til bruk og kast, plast og forsøpling er tydeleg formidla, har boka til felles med dei fem andre at ho også har noko på hjartet som vedkjem det indre, mentale miljøet vårt. Kva er det vi manglar? Ingenting. Ingenting er boltreplass og pusterom. Ingenting kan vi lage dersom vi veit kva slags knappar vi ikkje skal trykke på. Det veit Neikob – og lesarane hans.

Janne Karin Støylen

Janne Karin Støylen er bonde og litteraturvitar.