Bok
Etter skogen
Vidar Sundstøl skriv tankevekkjande om livet etter sivilisasjonen.
Vidar Sundstøl har skrive tolv romanar.
Foto: Paal Audestad
At sivilisasjonen fungerer, er sjølvsagt for oss, informasjonsstraumen er ei vedvarande flodbølgje, me har tilgang til kunnskap om alt mogleg heile tida. Men tenk om det ikkje var slik. Me har lov og land, pengesystemet er intakt, straumrekningane kjem, og sjølv om det er vinter og «trei står svarte i skogen», veit me at våren kjem med brestande knopp og brånande bre. Men tenk om det ikkje var slik heller.
Miserabelt liv
I den nye romanen til Vidar Sundstøl vantar verda mykje av det som me opplever som essensielt. Me er eit par tiår fram i tida, og ein mann, ein norsk forfattar som lenge har vore inaktiv i yrket sitt, er i Sverige, der han lever eit miserabelt liv. Mykje har skjedd, først og fremst er all skog daud, først ved sjukdom, og seinare ved brannar, og det meste av liv tykkjest borte.
Den gamle mannen bur for seg sjølv, han har mest ingenting, samfunnet har løyst seg opp, det eksisterer så godt som ingen informasjon, med unnatak av at det vert delt ut mat og vatn i ein skulegard. Maten er alltid kjøt av ukjent opphav, og sidan me ikkje møter andre dyr i teksten enn folk og ei daud rotte, er det gjerne like greitt at ein ikkje veit kva vesen kjøtet ein gong var ein del av.
Verda utanfor veit den gamle mannen ingenting om. Om land fungerer, om til dømes Sverige har ein eller annan administrasjon, om det finst bilar, om noko i det heile er i orden. Han har ikkje kontakt med nokon, han bur i ein tom by, men ved utdelinga av mat og vatn dukkar det opp folk, yngre og sterkare enn han. Han ottast dei, han held seg på avstand, og han er den som får minst.
Han har berre seg sjølv, men han har også minne, ikkje minst tenkjer han mykje på skog, på tre, som har vore viktige for familien hans i alle år. Dei levde av skogen, ved skogen og i skogen. Kanskje tenkte dei ikkje så mykje over dette, då skogen var til, då han var ein sikker føresetnad.
Digital tilgang – heilt utan binding
Prøv ein månad for kr 49.
Deretter kr 199 per månad. Stopp når du vil.
