Julehefte

Nana Rise-
Lynum (red.):

Juletre

Norsk
Barneblad

I barndommen var julestemninga til å lite på. Når ein jaktar den gode julekjensla i vaksen alder, er det lett å komme på villspor. Trass i snø og songar, gåver og granbar kjenner vi ofte på at noko manglar. Kanskje vil årets praktutgåve av Juletre kunne bøte på denne kjensla for mange lesarar. Heftet gjev eit etterlengta gjensyn med vår barndoms jul. Slik såg jula ut i femti-, seksti- og syttiåra.

Sjølv om det tradisjonsrike heftet skriv seg heilt tilbake til 1898, er det frå desse tiåra dei fleste forteljingane i heftet er henta. Dei er skrivne av Ragnvald Vaage, Mikkjel Fønhus, Halldis Moren Vesaas, Jan Magnus Bruheim, Halvor J. Sandsdalen, Åsta Holth og endå fleire. Ein kjem ikkje utanom metaforen «skattkiste» i møte med dette rikhaldige utvalet. Først og sist er det illustrasjonane til Solveig Muren Sanden som opnar dørene inn til jula, slik mange av oss hugsar henne.

Spørsmålet er om forteljingane høyrer heime i ei tid som er forbi, og om verdien av heftet dermed avgrensar seg til å vere ei nostalgisk minnebok for ein aldrande generasjon lesarar. Det kan sjå slik ut frå utsida. Nokre av dei religiøse korttekstane og dikta har ei formanande og framand form som tilfører lite anna. Rikdommen i forteljekunsten til forfattarane elles er derimot overveldande. Innhaldet er uvant, og utfallet er ofte uventa, men historiene kan knyte band mellom barndommen før og no, om dei vert lesne høgt av nokon som hugsar, for nokon som vil lytte.

Janne Karin Støylen

Janne Karin Støylen er bonde og litteraturvitar.