Biletbok

Johan B. Mjønes og Åshild
Irgens (ill.):

Lukas og Kim

Aschehoug

Lukas og Kim er den fjerde boka om Lukas. Johan B. Mjønes og Åshild Irgens har funne fram til ei formidling der illustrasjonane spelar ei større og meir sjølvstendig rolle enn vi vanlegvis ser i biletbøkene for dei minste lesarane. Der hierarkiet mellom forfattar og illustratør tradisjonelt går i forfattarens favør, er det motsett i bøkene om Lukas.

Teksten til Mjønes er kort og heilt enkel og skildrar berre den ytre handlinga. Illustratøren får dermed stor tillit og brukar han til å utdjupe det usagde og forsterke stemningane. Sjølv om Åshild Irgens legg inn element som opnar for å dikte vidare i oppslaga, er bruken av effektar dempa og forsiktig.

I gode barnebøker ventar vi oss eit rikare og meir variert ordforråd enn i den munnlege samtalen. Skriftspråket har vanlegvis fleire nyansar enn talespråket, men teksten i denne boka er i staden svært enkelt oppbygd og dermed straks forståeleg. I høgtlesinga kan boka få større verdi om barnet først får lese biletet og fortelje historia som finst i illustrasjonen. Teksten kan deretter støtte og stadfeste barnelesarens eiga forteljing.

Janne Karin Støylen