Nationaltheatret / Østfold kulturutvikling:

Fredrik Høyer og Mattis Herman Nyquist:

Uten navn

Scenografi/lysdesign: Øyvind Wangensteen
Komponist: Gaute Tønder

Teater bygt på research er ein sjanger som har fått ein framskoten posisjon i kulturlivet vårt. Kan hende lever vi i ei tid med så mykje medieinformasjon at vi stundom treng eit kunstnarblikk på dagsrøynda for at ho skal vedkome oss.

Framsyninga Høyer og Nyquist har laga, og som no går på Nationaltheatret, gir eit fokus på etterlatne etter rusmisbrukarar. Fire skodespelarar fortel, stort sett i monologparti, om bitre, hjarteskjerande røynsler med sine næraste, det meste direkte teke frå intervju med dei det galdt. Trass i overtydande autentisitetsfaktor vert stykket delvis for fragmentarisk til at det kan gripe oss heile tida, men når det grip, grip det til gagns.

Anne Marie Ottersen, Nils Jørgen Kaalstad, Gine Cornelia Pedersen og Alfred Ekker Strande har alle den personleg appellerande varmen på plass, og dei held uttrykket stramt og klårt både i monologane og overgangssekvensane. Scenografien er ein bakvegg med lysrøyr i skiftande farger, og musikken gir det heile eit hardt, melankolsk lydteppe. I denne søte førjulstida kan nok det vere noko til ettertanke.

Bent Kvalvik

Bent Kvalvik er filmarkivar og fast teatermeldar i Dag og Tid