Auken i bygg- og anleggskostnadene kjem til å verta ei stor utfordring framover. Tida er inne for harde prioriteringar og avviklingar av dei mest kostnadskrevjande og minst samfunnsnyttige kommunale og statlege planlagde byggjeprosjekta.

Og det er nok å ta av – ikkje minst innanfor samferdsle. Gode innspel kan ein få frå Naturvernforbundet, som i april laga ei liste med framlegg om vegprosjekt som bør endrast ut frå miljø- og klimaomsyn – og vern av viktig matjord.

I Oppland kan ein byrja med den planlagde nye firefeltsvegen til 12 milliardar mellom Moelv og Øyer oppover Gudbrandsdalen. Dagens vegstandard bør vera grei nok. Og det er trass alt grenser for kor store vegar ein skal byggja for å hindra kø for hyttefolk på veg til fjellet i helgene.

I Bærum kan dei lesa Aksel Fridstrøms artiklar i Minerva om Fornebubanen – for deretter å avvikla heile byggjeprosjektet. Det er merkeleg at det alt ikkje vart stogga då rapporten frå kvalitetssikringa kom. Konklusjonane var mildt sagt kritiske.

Banen skulle opphavleg kosta 4,5 milliardar kroner. No ligg kostnaden på mellom 25 og 35 milliardar. Og då har ein berre teke inn kostnadsveksten til og med 2021 – ikkje for heile den planlagde byggjeperioden fram til 2029.

Feildisponeringar er øydeleggjande for både økonomi og klima. Er det noko klimakrisa bør læra oss, er det å nytta ressursane klokt.

Svein Gjerdåker