Støtt samvirketanken og kjøp Tine-mjølk – ikkje Q-mjølk! For same kvar du måtte driva gard, hentar Tine mjølka di. Denne henteplikta har ikkje Q-meieria som kom i 2000. Og ryk henteplikta, ryk mjølkebruka utanfor dei store jordbruksområda i landet.

Men støtta til samvirkeorganisasjonane heng i ein stadig tynnare tråd etter kvart som Tine legg ned og sentraliserer meieria. Og Nortura legg ned nok eit slakteri for så å senda dyra endå nokre mil ekstra i slaktebilen, no sist slakteriet i Otta i Gudbrandsdalen.

Det siste utspelet frå Tine, som Nationen skriv om, er at dei har vedteke å leggja ned produksjonen av Balsfjordosten. Denne geitosten meiner Tine det ikkje vil svara seg å produsera lenger, når dei no skal utbetra meieriet i Storsteinnes i Balsfjord kommune i Troms.

Rett nok er det ein liten prosent av geitemjølka som går til denne osten, men nedlegginga er eit nytt lite nederlag for ei geitenæring som treng optimisme og satsing for å kunna klara seg. Det finst mange andre ostar ein kan eta i dette landet, men Balsfjordosten har vorte ei nasjonal merkevare som har synleggjort kvalitetane til geitemjølka, og som kan få folk til å kjøpa andre typar norsk geitost òg.

Geitenæringa har det siste tiåret vore gjennom ei stor sanering og fått til, etter mykje strev, ei imponerande oppbygging av ein frisk geitestamme. Dette har ført til betre dyrevelferd og betre mjølk fordi geitene er friskare enn før. No gjeld det å sikra at næringa klarer seg, for geitenæringa er som skapt for Noreg og dei store utmarksbeita våre.

Svein Gjerdåker