Sist laurdag inngjekk USA og Nato ein avtale med Taliban om å trekkja dei militære styrkane ut av Afghanistan innan 14 månader. Motytinga frå Taliban er at dei skal stansa alle krigshandlingar og kutta alt samkvem med Al Qaida.

Etter at avtalen var klar, sende USAs ambassade i Afghanistan ut ei melding om at dette var byrjinga på ei «lysande framtid» for landet. Det er berre tull og ein hån mot folket i Afghanistan. Ei framtid med Taliban kan aldri verta lysande.

Dessutan har Taliban alt brote avtalen om stans i kamphandlingar, med påfølgjande gjengjeldingar frå USA. Likevel er avtalen naudsynt, og USA og Nato vedgår med dette at krigen mot Taliban aldri kan vinnast.

Dette burde USA, Nato og Noreg ha skjøna frå byrjinga av, men fåkunne og naivitet førte oss likevel inn ein krig som no har vara i 18 år. Kostnaden har det afghanske folket måtta betala.

Men no må afghanarane altså slita med Taliban i endå fleire år. Slik sett er det kynisk av USA og Nato å trekkja seg ut. Men vi er nøydde til å ta sjansen på at ein fredsavtale kan føra fram.

Ideen om at vi i Vesten, ved hjelp av enorme mengder moderne teknologiske våpen og milliardar av dollar i bistandspengar, skal kunna fiksa verda og skapa demokrati og fridom over alt, har vore ein naiv illusjon.

Svein Gjerdåker