Leiar
Krisa i barnevernet
Lys og blomar utanfor huset der Tamima Nibras Johar vart drepen. Ho vart drepen medan ho var på på jobb i ein bustad tilknytt barnevernet.
Foto: Cornelius Poppe / NTB
Drapet på Tamima Nibras Juhar er tragisk og opprørande. At drapsmannen er ein 18-åring med høgreekstreme haldningar, skaper uhygge, ikkje minst i den muslimske befolkninga vår.
Drapet aktualiserer på nytt situasjonen for barnevernstenesta landet over. I ein nettartikkel publisert på Dagogtid.no onsdag denne veka fortel Morten B. Nielsen ved Statens arbeidsmiljøinstitutt at tilsette i barnevernet i særleg grad er utsette for trugsmål og vald.
Dei kan få ting kasta etter seg, verta skrikne til og alvorleg truga – også på livet. Og som han seier, når slike trugsmål vert vanlege og ein del av arbeidsdagen, tek ein til slutt ikkje trugsmåla nok på alvor.
Med slike arbeidstilhøve er det ikkje uventa at barnevernet har store bemanningsproblem. Det er vanskeleg å få tak i folk, og folk kjem og sluttar i høgt tempo. Fagforbundet sende i fjor ei bekymringsmelding til Barne-, ungdoms- og familiedirektoratet som fortalde at ved visse barnevernsinstitusjonar er det ingen som har vore tilsett i meir enn tre år. Situasjonen er fleire stader så krevjande at tillitsvalde er uroa for at enkelte avdelingar ikkje kan drivast lenger.
Og lite tyder på at situasjonen vert betre. Med dei stadige oppslaga om ungdomsvald skjønar vi at det heller vil gå motsett veg. Likevel vert ikkje barnevernet nok prioritert. Dessutan er det altfor lett å tala om meir førebyggjande arbeid. Greitt, kven er imot det? Men i praksis må vi uansett til ei kvar tid ha eit skikkeleg tilbod for born som treng å vera på ein institusjon av eit eller anna slag.
Digital tilgang – heilt utan binding
Prøv ein månad for kr 49.
Deretter kr 199 per månad. Stopp når du vil.
