Krigen i Afghanistan har sidan 2001 kosta USA snart 2 trillionar dollar, eller 17.000 milliardar kroner. Det er ein sum utanfor fatteevne.

No vil president Trump redusera talet på soldatar i Afghanistan frå 14.000 til 7.000.

Den amerikanske forfattaren Robert D. Kaplan var rådgjevar under George W. Bush, då støtta han Irak-krigen, men han har angra i ettertid. Denne veka argumenterer han i New York Times for at USA like godt bør trekkja seg militært heilt ut av landet.

Han meiner ein militær siger mot Taliban er urealistisk å få til, for klanar, krigsherrar og mafialikande nettverk som kontrollerer narkotikahandelen, har trass i USAs enorme pengebruk og militære slagkraft teke kontroll over store delar av landet.

Spørsmålet er i høgste grad interessant for Noreg òg. Vi har vore i krigen like lenge som USA og har i dag stabsoffiserar og soldatar frå spesialstyrkane stasjonerte i landet. 11,5 milliardar kroner hadde vi brukt på sjølve krigen fram til 2016. Pengar er éin ting, like viktig er å drøfta kva den militære innsatsen vår er godt for, målt opp mot alle lidingane og tapa av liv som krigen fører med seg.

Krigen i Afghanistan er tapt for lenge sidan. Likevel held den norske krigsinnsatsen fram knapt utan debatt. Det er som om krigen har vorte ein normaltilstand utanfor nordmenns ålmenne interesse.

Det minste vi no kan krevja, er at regjeringa kjem med ei skikkeleg grunngjeving kvart år for kvifor vi skal halda fram med krigføringa år etter år. Og grunngjevinga må vera basert på ei ærleg vurdering av kva vi oppnår, ikkje lik den skjønmålinga vi har fått til no.

Svein Gjerdåker