Regjeringa vil ha fritt skuleval for alle elevar i den vidaregåande skulen. Opptak av elevar etter nærskuleprinsippet skal altså avviklast. Men ikkje heilt. Det skal vere mogleg for fylkeskommunane å fastsetje eigne inntaksområde. KS har fått i oppdrag å utarbeide modellen.

Dette temaet er fullt av motstridane interesser og ulike konsekvensar. I utgangspunktet bør alle elevar få velja fritt. Det motiverer mange elevar til å gjera det godt på ungdomsskulen. Og det gjev elevar høve til å skifta miljø om dei har trong for det.

Men å kalla det fritt skuleval er upresist, sidan det er karakterane som avgjer kven som får plass og ikkje. I dei store byane vil dette fort føra til A- og B-skular.

Samstundes vert det urimeleg at større bykommunar skal avgrensa skulevalet til at elevane kan velja skule innanfor berre sin eigen bydel.

Særleg i Oslo vil dette kunne føra til ein auke i talet på privatskular, noko som absolutt ikkje er ynskeleg. Viktigare er det, dersom ein vil hindra at ein får A- og B-skular, å gje skuletrøytte elevar eit anna tilbod enn endå fleire teoritimar på skulen.

Uansett bør fylkeskommunane halda fram med å avgjera opptakssystemet. Det er dei som har best kunnskap om dei regionale omsyna som bør takast når reglane for skuleval skal avgjerast. Og med fleire store fylke, som ikkje minst mastodonten Viken, må ein kunne variera ordninga innanfor same fylke. Det som er lurt for Hallingdalen, kan vera uhelding for Asker og Bærum.

Svein Gjerdåker