Då ein trudde omgrepet skam hadde gjort sitt på ulike arenaer i 2019, kom verdsmeister Magnus Carlsen (28) på bana. Han ville ikkje seia stort etter finaletapet i VM i fischersjakk, men nøgde seg med éin kommentar: «Jeg skammer meg.» Men kva skjedde eigenleg? Kva seier ekspertane?

VG skreiv for nokre år sidan at når olja tek slutt, kan vi leva av å kommentera sjakk. Dagen etter finalen på Høvikodden ville Dagsrevyen ha meg i studio for å diskutera Carlsens sjakkskam, men eg takka nei. Sjakkskamma åleine kan ikkje berga planeten, og det er berre Carlsen som veit korleis han kunne tapa finalen mot Wesley So (26) med siffera 2,5–13,5.

Eg trur ikkje det er så farleg for sjakksporten, korkje i Noreg eller internasjonalt, at Carlsen tapte ein finale på eit kunstmuseum. Det var utklassinga som var spesiell. I det litt merkelege poengsystemet er botnlina at So vann fire av seks parti og spela to remisar. Carlsen hadde gode sjansar til siger i det fyrste partiet, medan resten av partia vart dominerte av So.

Filippinsk-amerikanske So kom før kvar runde til spelelokalet hand i hand med den amerikanske adoptivmora si. Han verka roleg, harmonisk, truskuldig og lukkeleg over å kunna spela sjakk utan opningsteori og dataanalysar. Det norske publikummet lika guten som braut med den biologiske familien sin for nokre år sidan. I 2017 var han nummer to i verda i klassisk sjakk på ratinglistene, så vi sjakkspelarar veit godt kven han er. Vi hadde berre gløymt at guten har ei kjensle for spelet som er i geniklassen.

Atle Grønn

Atle Grønn er internasjonal
meister i sjakk.