Magnus Carlsens trenarar gjennom ti år var Peter Heine Nielsen og Laurent Fressinet. Men verdsmeisteren ville alltid ha med ein joker på treningssamlingane, ein ukjend fjerdemann. Det er enklare å spela sjakk, tennis, fotball og basket med fire enn med tre. I 2015 var jokeren kinesaren Ding Liren, som ikkje kunne tru si eiga lukke over ein uventa invitasjon til ei veke med Carlsen på luksushotell i Doha.

I 2017 gjorde Carlsen ein ny uventa gest då han henta inn ein ukjend 13-åring frå internett, frå eit guterom i Iran: Alireza Firouzja. Carlsen varma opp med fire lynparti, og vann 3–1. Han tok Nielsen og Fressinet til side: «Såg de det?» «Kva då?» spurde dansken og franskmannen. «Guten har ikkje vyrdnad for meg. Han spelar sitt eige spel, spelar for å vinna. Han er 13 år og uredd!»

Gjennom heile karrieren hadde Carlsen gjort alt for å skapa vyrdnad hos motstandarane, ein vyrdnad som gav han mange ekstra poeng. Men Alireza kjende ikkje redsle. Dei tre vaksne i rommet skjøna at guten kunne vera den neste verdsmeisteren. Før kandidatturneringa i 2022 sa Carlsen at han berre ville forsvara VM-tittelen om Firouzja vart utfordrar.

I dag er verdstrearen Ding Liren (2780) verdsmeister. Verdsfiraren Jan Nepomnjasjtsjij (2779) har tapt to VM-kampar på rad. Omdømet til VM-tittelen er svekt etter at VM-finalistane Ding og «Nepo» båe to scora under 50 prosent i ei turnering i Romania i mai, der båe tapte mot 19 år gamle Firouzja.

I juli 2021 vart Firouzja fransk statsborgar, eit klokt val. Det same året passerte han 2800 i rating som den yngste i historia. Men den nye fridomen i Frankrike endra guten. Det neste året spela han lite sjakk, han var ikkje lenger fanatisk oppslukt av 64 svarte og kvite felt.

Han byrja sjå andre fargar, og vart hekta på mote. Firouzja har ein draum om å verta fransk motedesignar. For hans liv og lukke er dette kan henda ein god plan, men sjakkeliten trur ikkje lenger han vert den neste verdsmeisteren.

Firouzja er, kor som er, nummer to i verda i dag med 2786 i rating. Avstanden til Carlsens 2853 er enorm, men korkje Carlsen eller Firouzja vert rekna som seriøse VM-utfordrarar. Det er eit vakuum i toppen når dei to beste vantar motivasjonen.

Atle Grønn

Atle Grønn er internasjonal meister i sjakk.