Seint og tidleg
Den som er sein på foten, skal vera tidleg på vegen, seier ordtaket. Dersom du er seinføtt og ikkje tek omsyn til det, kjem du for seint, og då kan det henda at folk kallar deg seinslark, seinsokk, seinplugg og det som verre er. No er det ikkje støtt det hjelper å vera tidleg ute heller. Både vêret, teknikken og andre folk kan seinka deg, dimed kan du koma for seint til ei seinvakt jamvel om du fór tidleg av garde. Trøysta er at det ikkje berre er me menneske som kjem i seinaste laget. Sanninga er ofte seinfaren, seiest det – ho dryger med å koma fram.
Sein er eit velkjent ord i Norden. Me har islandsk seinn, færøysk seinur og dansk og svensk sen. Det er ikkje berre forma som er lett å kjenna att. Tydinga er òg mykje den same. I norrøne tekster finn me ord som seinbúinn (‘seinbuen, seint ferdig’), seinlátr (‘seinlåten, seinvoren’) og seinka (‘seinka, hefta; dryga med’). Sein er truleg i ætt med sid (‘som når langt ned’, jf. fotsid), eit adjektiv som òg har gjeve oss sidan og engelsk since. Bakgrunnen til sein veit me elles lite om. Det som derimot er klårt, er at sein fungerer framifrå som motsetnad til snar.
Du kan vera snarrådig eller seinrådig, snartenkt eller seintenkt, snarbeden (‘lett å be; viljug’) eller seinbeden (‘tung å beda; uviljug’), «snar i snuen» eller «sein i snuen». Det gjævaste er visst å vera snar, for då er du ikkje sein om å gjera det som krevst. Haken er at den som støtt vil vera snøgg, før eller seinare kjem til å dumma seg ut. Nokre meiner at det er like greitt. Dei kan ikkje tenkja seg noko verre enn å måtta sjå på seindregne folk som stullar og steller med endeframme gjeremål i ei heil æve. Det nyttar ikkje om den seine skundar seg, seier eit gamalt fyndord, og det er vel noko i det.
Nokre seinslarkar er trege i heile kroppen, medan andre er trege i einskilde kroppsdelar. Dei kan vera snartenkte og seinføtte eller snarmælte og seinhendte. Me plar seia at «d’er betre seint enn aldri», men det er leitt å verta skoten av ein som er sein i avtrekket, i alle fall om du får seinskadar attpå. Det er elles vanleg å nytta sein om langt framskridne saker, til dømes årstider: Me talar om seinsumaren, seinhausten og seinvinteren. Seinvåren er det mindre tale om. Han vert kanskje borttrengd av føresumaren?
Kristin Fridtun
Kristin Fridtun er filolog og forfattar.
E-post: kristin.fridtun@gmail.com
Er du abonnent? Logg på her for å lese vidare.
Digital tilgang til DAG OG TID – heilt utan binding
Prøv ein månad for kr 49.
Deretter kr 199 per månad. Stopp når du vil.
Den som er sein på foten, skal vera tidleg på vegen, seier ordtaket. Dersom du er seinføtt og ikkje tek omsyn til det, kjem du for seint, og då kan det henda at folk kallar deg seinslark, seinsokk, seinplugg og det som verre er. No er det ikkje støtt det hjelper å vera tidleg ute heller. Både vêret, teknikken og andre folk kan seinka deg, dimed kan du koma for seint til ei seinvakt jamvel om du fór tidleg av garde. Trøysta er at det ikkje berre er me menneske som kjem i seinaste laget. Sanninga er ofte seinfaren, seiest det – ho dryger med å koma fram.
Sein er eit velkjent ord i Norden. Me har islandsk seinn, færøysk seinur og dansk og svensk sen. Det er ikkje berre forma som er lett å kjenna att. Tydinga er òg mykje den same. I norrøne tekster finn me ord som seinbúinn (‘seinbuen, seint ferdig’), seinlátr (‘seinlåten, seinvoren’) og seinka (‘seinka, hefta; dryga med’). Sein er truleg i ætt med sid (‘som når langt ned’, jf. fotsid), eit adjektiv som òg har gjeve oss sidan og engelsk since. Bakgrunnen til sein veit me elles lite om. Det som derimot er klårt, er at sein fungerer framifrå som motsetnad til snar.
Du kan vera snarrådig eller seinrådig, snartenkt eller seintenkt, snarbeden (‘lett å be; viljug’) eller seinbeden (‘tung å beda; uviljug’), «snar i snuen» eller «sein i snuen». Det gjævaste er visst å vera snar, for då er du ikkje sein om å gjera det som krevst. Haken er at den som støtt vil vera snøgg, før eller seinare kjem til å dumma seg ut. Nokre meiner at det er like greitt. Dei kan ikkje tenkja seg noko verre enn å måtta sjå på seindregne folk som stullar og steller med endeframme gjeremål i ei heil æve. Det nyttar ikkje om den seine skundar seg, seier eit gamalt fyndord, og det er vel noko i det.
Nokre seinslarkar er trege i heile kroppen, medan andre er trege i einskilde kroppsdelar. Dei kan vera snartenkte og seinføtte eller snarmælte og seinhendte. Me plar seia at «d’er betre seint enn aldri», men det er leitt å verta skoten av ein som er sein i avtrekket, i alle fall om du får seinskadar attpå. Det er elles vanleg å nytta sein om langt framskridne saker, til dømes årstider: Me talar om seinsumaren, seinhausten og seinvinteren. Seinvåren er det mindre tale om. Han vert kanskje borttrengd av føresumaren?
Kristin Fridtun
Kristin Fridtun er filolog og forfattar.
E-post: kristin.fridtun@gmail.com
Fleire artiklar
Emma (Fanny L. Bornedal) arbeider som nattevakt ved rettsmedisinsk institutt, der foreldra i si tid vart utsette for drapsforsøk.
Foto: Another World Entertainment
Skrekkeleg skuffande
Likte du Nattevakten, kjem du ikkje til å elska Nattevakten: Demoner går i arv, dersom det var det du håpte på.
Som låtskrivar er Jessica Pratt meir oppteken av stemningar enn forteljingar, meiner Øyvind Vågnes.
Foto: Samuel Hess
Mindre er meir
Den nye plata til Jessica Pratt, Here in the Pitch, er hennar beste så langt.
Blaz (Aristote Luyindula) (t.v.) har ikkje stor tiltru til systemet, men aktivisten Haby (Anta Diaw) kjempar for å forbetre tilhøva i den falleferdige bustadblokka deira.
Foto: Laurent le Crabe
Oppussinga
Ladj Ly lenar seg mot melodrama etter ein rå debut.
Eirik Holmøyvik har trekt seg trekt seg som forskingsleiar ved Det juridiske fakultet i Bergen.
Foto: Kim E. Andreassen / UiB
Israel-boikott splittar akademia
Jussprofessor Eirik Holmøyvik prøvde å få omgjort vedtaket om Israel-boikott ved Det juridiske fakultetet i Bergen, men vart røysta ned. No har han trekt seg som forskingsleiar ved fakultetet.
Lite mat: Det er ikkje mykje mat å spore i 17. mai-biletarkivet til NTB, men Andrea (2) har iallfall fått is. Hurra!
Foto: Per Løchen /NTB
Mat på nasjonaldagen
Kva bør vi ete i dag om vi lèt årstida styre menyen?