Framleis i framgrunnen
Dersom ordet fram brått hadde vorte borte, hadde me vore i ei lei knipe. Kva skulle me ha sagt i staden for «att og fram» og «fram og tilbake»? Korleis skulle me ha skildra framsteg og framgang? Jau då, stundom kunne me ha nytta ord som føre (t.d. «gå føre nokon» i staden for «gå framfor nokon») og ut (t.d. «ut på dagen» i staden for «fram på dagen»), men om me skulle ha leita fram slike fram-avløysarar støtt, hadde det ikkje vorte mykje framdrift i talen vår.
Fram er rett og slett eit framifrå adverb. Etter alt å døma heng fram i hop med eit germansk adjektiv som tyder ‘dugande, god, førande’. Då er det berre rimeleg at me ofte nyttar superlativforma fremst i tydinga ‘best, mest førande’: «Ho er den fremste på feltet.» Meir uventa er det nok at engelsk from (‘frå’) er same ordet som vårt fram. Fram har truleg hatt grunntydinga ‘frametter’, som seinare har endra seg til ‘av stad’ og ‘bort (frå)’. Då er det radt ikkje so underleg at from har fått tydinga ‘frå’. Preposisjonen frå (og ifrå) kjem dessutan frå fram. Eit anna ord i denne ætta er framand, som opphavleg tydde ‘(som er) borte, fjerna frå’. Eit tredje ord er frum- (‘fyrste-, opphavs-‘), som me finn i ord som frumboren (‘fyrstefødd’) og frumnordisk (‘urnordisk’).
Det er beint fram uråd å leggja fram og drøfta alle tydingane til fram her, men tre av dei skal få syna seg fram. Me kan for det fyrste nytta fram til å målbera at ei verksemd eller rørsle går føre seg ‘i den leia ein ser eller går, mot eit visst mål’, jamfør seiemåtar som «tura fram», «prøva seg fram» og «halda fram». Sidan me plar førestilla oss at den tida me ikkje har vore gjennom enno, ligg framfor oss (jf. framtid), seier me at me «ser fram til» noko. Folk som tenkjer langt fram, er framtenkte. Unge folk «har tida framfor seg».
I døma ovanfor er verksemda eller rørsla framleis i gang, men me kan òg nytta fram om det å føra noko til endes, nå eit mål. Me kan «rekka fram i tide» (jf. «vera framme»), «vinna fram» (lukkast), «ala fram frukttre», «bera fram eit barn» og «hjelpa ein fram» (jf. fremja). For det tredje kan fram tyda ‘til syne, ut i dagen’, jamfør «pipla fram», «lokka fram», «stå fram», «seia fram» og «gå fram av samanhengen». Og som me alle veit: «Når sanninga kjem fram, får lygna skam.»
Kristin Fridtun
Kristin Fridtun er filolog og forfattar.
E-post: kristin.fridtun@gmail.com
Er du abonnent? Logg på her for å lese vidare.
Digital tilgang til DAG OG TID – heilt utan binding
Prøv ein månad for kr 49.
Deretter kr 199 per månad. Stopp når du vil.
Dersom ordet fram brått hadde vorte borte, hadde me vore i ei lei knipe. Kva skulle me ha sagt i staden for «att og fram» og «fram og tilbake»? Korleis skulle me ha skildra framsteg og framgang? Jau då, stundom kunne me ha nytta ord som føre (t.d. «gå føre nokon» i staden for «gå framfor nokon») og ut (t.d. «ut på dagen» i staden for «fram på dagen»), men om me skulle ha leita fram slike fram-avløysarar støtt, hadde det ikkje vorte mykje framdrift i talen vår.
Fram er rett og slett eit framifrå adverb. Etter alt å døma heng fram i hop med eit germansk adjektiv som tyder ‘dugande, god, førande’. Då er det berre rimeleg at me ofte nyttar superlativforma fremst i tydinga ‘best, mest førande’: «Ho er den fremste på feltet.» Meir uventa er det nok at engelsk from (‘frå’) er same ordet som vårt fram. Fram har truleg hatt grunntydinga ‘frametter’, som seinare har endra seg til ‘av stad’ og ‘bort (frå)’. Då er det radt ikkje so underleg at from har fått tydinga ‘frå’. Preposisjonen frå (og ifrå) kjem dessutan frå fram. Eit anna ord i denne ætta er framand, som opphavleg tydde ‘(som er) borte, fjerna frå’. Eit tredje ord er frum- (‘fyrste-, opphavs-‘), som me finn i ord som frumboren (‘fyrstefødd’) og frumnordisk (‘urnordisk’).
Det er beint fram uråd å leggja fram og drøfta alle tydingane til fram her, men tre av dei skal få syna seg fram. Me kan for det fyrste nytta fram til å målbera at ei verksemd eller rørsle går føre seg ‘i den leia ein ser eller går, mot eit visst mål’, jamfør seiemåtar som «tura fram», «prøva seg fram» og «halda fram». Sidan me plar førestilla oss at den tida me ikkje har vore gjennom enno, ligg framfor oss (jf. framtid), seier me at me «ser fram til» noko. Folk som tenkjer langt fram, er framtenkte. Unge folk «har tida framfor seg».
I døma ovanfor er verksemda eller rørsla framleis i gang, men me kan òg nytta fram om det å føra noko til endes, nå eit mål. Me kan «rekka fram i tide» (jf. «vera framme»), «vinna fram» (lukkast), «ala fram frukttre», «bera fram eit barn» og «hjelpa ein fram» (jf. fremja). For det tredje kan fram tyda ‘til syne, ut i dagen’, jamfør «pipla fram», «lokka fram», «stå fram», «seia fram» og «gå fram av samanhengen». Og som me alle veit: «Når sanninga kjem fram, får lygna skam.»
Kristin Fridtun
Kristin Fridtun er filolog og forfattar.
E-post: kristin.fridtun@gmail.com
Fleire artiklar
Palestinarar på veg ut av Rafah måndag, etter at Israel varsla nye åtak i byen lengst sørvest i Gaza.
Foto: Ramadan Abed / Reuters / NTB
Den raude streken i Rafah
Kanskje skal sluttspelet i Gaza-krigen stå i Rafah. Det blir neppe kort.
Titusenvis av menneske har samla seg framfor parlamentet i Tbilisi dei siste vekene, i protest mot det dei kallar «den russiske lova».
Foto: Ida Lødemel Tvedt
Krossveg i den georgiske draumen
TBILISI: Demonstrasjonane i Georgia kjem til å eskalere fram mot 17. mai.
Mange meiner at det er no landet tek vegvalet mellom Russland og Vesten.
Utvalsleiar Line Eldring leverer NOU-rapporten om EØS-avtalen til utanriksminister Espen Barth Eide (Ap).
Foto: Terje Pedersen / NTB
Kva er alternativet til EØS-medlemskap?
Anna Kleiva er forfattar og omsetjar.
Foto: Privat
Anna Kleiva er ny diktskribent i Dag og Tid
«Eg ser fram til å arbeida meir med einskilde dikt frå ulike forfattarar.»
Foto: Hatem Khaled / NTB
Krasnik og eg
Dei som følger debatten, kan sjå to ulike haldningar til Israel og Palestina utfalde seg.