«Bak de norske i det ukeslange løpet lå de som knekte paraplyer, alle de ‘gamle’ stormaktene i denne folkelige og populære hjernegymnastikken.» Deretter listar skrivaren opp USA, Brasil og Sverige, og når han nemner Kina, passar han på å framheva at presidenten i det kinesiske bridgeforbundet er sjølvaste Deng Xiaoping. Kommentar: «… forøvrig det eneste tillitsverv han har igjen!»

Brevet har overskrifta «Norge – en stormakt i bridge» og er stila til presse- og kulturavdelinga i Utanriksdepartementet frå Den kongelige norske ambassade i Santiago i Chile. Forfattar er ambassadøren sjølv, Reiulf Steen.

Det var landslagsspelaren Glenn Grøtheim som føreslo for den norske lagleiinga at når no VM for lag fyrst skulle spelast i Santiago, burde den norske troppen oppsøkje ambassaden og gje seg til kjenne. Dette var i 1993; Steen var ambassadør i Chile i åra 1992–96.

Grøtheim uttrykkjer misnøye med framstillinga av Steen i TV-serien Makta; i Santiago fekk han eit langt meir positivt inntrykk av denne politiske legenda enn det serien gjev grunnlag for. Faktisk vart Steen så glad for å møte det unge norske laget at han var til stades som bakspelar gjennom store delar av meisterskapen. For å ha glede av dette må ein kunne litt om bridge.

I stil med dei mange kunstnariske fridomane i Makta kan vi godt hevde at Steens nærvær var avgjerande for den norske suksessen i Santiago. Laget kom seg til semifinalen mot Brasil og vann denne på mirakuløst vis, før Nederland diverre vart for sterke i finalen. Men sylvmedalje i VM var sensasjonelt bra av Noreg – som vel å merke har vore nokså uavbrote i verdstoppen sidan den gongen.

Meisterskapen vart forresten spela på den tida då Oslo-avtala vart røyndom. Steen passar på å nemne i brevet sitt at chilensk presse i desse dagane gav Noreg nesten like mykje merksemd for bridge som for fredsarbeid.

Erlend Skjetne

Erlend Skjetne er tidlegare juniorlandslagsspelar i bridge.