Det er ikkje kvar helg ein blir invitert i to bryllaup, men det skjedde med nokre privilegerte bridgespelarar i sumar. Heldigvis var det eine på laurdag og det andre på sundag.

På laurdagen var det eit reint bridgepar som gifte seg. Sverre Johan Aal frå Kvam i Nord-Trøndelag er operasongar, men òg tidlegare verdsmeister i bridge i klassen U28. Brura, Hilde Aas Nøst frå Molde, er geoteknikar med doktorgrad, og spela i førre sesong i den norske eliteserien. Dei møttest gjennom Studentenes bridgeklubb i Trondheim i 2007, etter at Hilde fann vegen til eit nybyrjarkurs. Bryllaupsinvitasjonane deira hadde form som eit spelkort.

Det er prov på eit sterkt partilhøve at desse to i tillegg til å bu under same tak stundom gjer det høveleg bra som makkerpar ved bridgebordet. Generelt er det ikkje tilrådd for par i kjærleikslivet å spela bridge i makkerskap med kvarandre, då dette ofte har synt seg å leie til bitre kranglar og vald, somtid drap.

Dagen etter var det ingeniør, eliteseriespelar og tidlegare juniorlandslagsspelar Petter Aulid Eide frå Hamar som skulle gifte seg med si kjære Marta Therese Lall, prosjektleiar og SV-politikar. Ho spelar førebels ikkje bridge, men her kompenserte familien til brudgommen tungt: Mora, faren og dei tre brørne hans er alle ihuga bridgespelarar.

Bryllaupet var prega av mange energiske born, og programmet var lagt opp etter det, men det kom til eit punkt der alle barnefamiliane hadde teke kveld og berre ein gjeng bridgespelarar sat att i lokalet. Då køyrde den mest edruelege av dei – som utruleg nok var meg – i veg for å hente kortstokkar og meldeboksar, og så vart det speling. Drikke fanst det i rik mon, og velsmakande restar av middagen. Den seine bryllaupsbridgen heldt neppe skyhøg kvalitet, men var likevel ei perfekt avslutning på helga.

No satsar vi på at alle dei seks ungane dei to ektepara til saman har i hus, med tida blir bridgespelarar.

Erlend Skjetne

Erlend Skjetne er tidlegare juniorlandslagsspelar i bridge.