Dyrekjære dovendyr
Mange av oss er vanedyr, men me har visst eit villdyr i oss òg. Når dette villdyret vaknar, må folk akta seg, for då er styrlause krefter i sving. Villskapen finst i tamde dyr òg: Hundar kan bita endå dei har lært at dei ikkje skal gjera det. Denne førestillinga om at me – og visse dyr – har ville og farlege drifter som ligg gøymde under ei sivilisert yte, er so innarbeidd at me snautt ansar henne. Men kor dyrisk er murmeldyret? Og er ikkje ordet dyrehund smør på flesk?
Dyr er eit nedervt substantiv som ter seg i alle dei germanske måla (t.d. svensk djur, tysk Tier). Opphavet skal vera ei indoeuropeisk rot med tydinga ‘anda’, so vårt dyr har mykje sams med ordet animal, som heng i hop med latin anima (‘ande, andedrag’). Dyr har jamt over den same tydinga i dei ulike måla, men engelsk skil seg ut: Deer vert berre nytta om dyr i hjorteætta. Det er ikkje so underleg. Norsk dyr kan nyttast om levande skapningar av mange slag, men ordet har òg – i mange hundreår – vore nytta i ei meir avgrensa tyding: Det har vore nemning for elg, hjort og rein. Orda dyrkjøt og dyrsteik vert helst nytta om reinsdyrkjøt. Dyrkolle er eit anna ord for ‘hind, hohjort’. Dyrehund er den gamle nemninga for ‘elghund’.
Somme dyrearter er utdøydde no, men dyreriket er framleis stort og mangslunge. Her finst landdyr og sjødyr, klauvdyr og klodyr, nyttedyr og skadedyr, livdyr og slaktedyr, totemdyr og offerdyr. Mange av dyrekategoriane våre overlappar kvarandre. Me kan til dømes seia at kattedyra er rovdyr, nattdyr og spendyr, og tamkatten er attpåtil husdyr og kjæledyr. Det typiske dyret har fire føter, lever på land og er måteleg stort, til skilnad frå fugl, fisk og insekt. Men det hender at me brukar dyr om slike skapningar òg, til dømes når me seier at den og den staden har «eit rikt dyreliv». Folk kan òg seia at dei har «fått dyr på seg». Då dreiar det seg gjerne om småe kryp (t.d. veggedyr) – det er ikkje stinkdyr eller beitedyr som har kasta seg over dei.
Fabeldyr og folk i dyreham har ikkje bruk for dyrlækjarar og dyrevernarar, men dei rettelege dyra har det. Nokre av dei er innestengde i dyrehagar og laboratorium der dyrepassarane vanrøktar dei, andre har eigarar som driv med dyreplaging for moro. Slike udyr burde nøya seg med leikedyr.
Kristin Fridtun
Kristin Fridtun er filolog og forfattar.
E-post: kristin.fridtun@gmail.com
Er du abonnent? Logg på her for å lese vidare.
Digital tilgang til DAG OG TID – heilt utan binding
Prøv ein månad for kr 49.
Deretter kr 199 per månad. Stopp når du vil.
Mange av oss er vanedyr, men me har visst eit villdyr i oss òg. Når dette villdyret vaknar, må folk akta seg, for då er styrlause krefter i sving. Villskapen finst i tamde dyr òg: Hundar kan bita endå dei har lært at dei ikkje skal gjera det. Denne førestillinga om at me – og visse dyr – har ville og farlege drifter som ligg gøymde under ei sivilisert yte, er so innarbeidd at me snautt ansar henne. Men kor dyrisk er murmeldyret? Og er ikkje ordet dyrehund smør på flesk?
Dyr er eit nedervt substantiv som ter seg i alle dei germanske måla (t.d. svensk djur, tysk Tier). Opphavet skal vera ei indoeuropeisk rot med tydinga ‘anda’, so vårt dyr har mykje sams med ordet animal, som heng i hop med latin anima (‘ande, andedrag’). Dyr har jamt over den same tydinga i dei ulike måla, men engelsk skil seg ut: Deer vert berre nytta om dyr i hjorteætta. Det er ikkje so underleg. Norsk dyr kan nyttast om levande skapningar av mange slag, men ordet har òg – i mange hundreår – vore nytta i ei meir avgrensa tyding: Det har vore nemning for elg, hjort og rein. Orda dyrkjøt og dyrsteik vert helst nytta om reinsdyrkjøt. Dyrkolle er eit anna ord for ‘hind, hohjort’. Dyrehund er den gamle nemninga for ‘elghund’.
Somme dyrearter er utdøydde no, men dyreriket er framleis stort og mangslunge. Her finst landdyr og sjødyr, klauvdyr og klodyr, nyttedyr og skadedyr, livdyr og slaktedyr, totemdyr og offerdyr. Mange av dyrekategoriane våre overlappar kvarandre. Me kan til dømes seia at kattedyra er rovdyr, nattdyr og spendyr, og tamkatten er attpåtil husdyr og kjæledyr. Det typiske dyret har fire føter, lever på land og er måteleg stort, til skilnad frå fugl, fisk og insekt. Men det hender at me brukar dyr om slike skapningar òg, til dømes når me seier at den og den staden har «eit rikt dyreliv». Folk kan òg seia at dei har «fått dyr på seg». Då dreiar det seg gjerne om småe kryp (t.d. veggedyr) – det er ikkje stinkdyr eller beitedyr som har kasta seg over dei.
Fabeldyr og folk i dyreham har ikkje bruk for dyrlækjarar og dyrevernarar, men dei rettelege dyra har det. Nokre av dei er innestengde i dyrehagar og laboratorium der dyrepassarane vanrøktar dei, andre har eigarar som driv med dyreplaging for moro. Slike udyr burde nøya seg med leikedyr.
Kristin Fridtun
Kristin Fridtun er filolog og forfattar.
E-post: kristin.fridtun@gmail.com
Fleire artiklar
Utvalsleiar Line Eldring leverer NOU-rapporten om EØS-avtalen til utanriksminister Espen Barth Eide (Ap).
Foto: Terje Pedersen / NTB
Kva er alternativet til EØS-medlemskap?
Anna Kleiva er forfattar og omsetjar.
Foto: Privat
Anna Kleiva er ny diktskribent i Dag og Tid
«Eg ser fram til å arbeida meir med einskilde dikt frå ulike forfattarar.»
Sofi Oksanen er av dei forfattarane som har fått flest prisar i Norden. Bøkene hennar er omsette til 46 språk. Biletet er frå bokmessa i Wien i 2022.
Foto: Nicola Montfort / Wikimedia Commons
Vald mot kvinner som våpen
Sofi Oksanen ønskte å skrive ei bok som er tilgjengeleg for vanlege lesarar, som kan lesast utan kart og utan at ein treng følgje krigsnyhenda dag for dag. At essayet Putins krig mot kvinner skulle bli så skremmande, såg ho ikkje heilt for seg.
For Balázs Orbán, som er politisk rådgjevar for statsministeren, er jobben å halda fast ved dei langsiktige måla til regjeringa mellom alle dei mindre og større oppgåvene i kvardagen.
Foto frå heimesida til Orbán Balázs i regjeringa
Verda ifølgje Orbán
BUDAPEST: I ei ny bok fortel ideologen til Viktor Orbán korleis Ungarn vil utfordra den liberale verdsordninga. Weekendavisen har møtt han.
Gjengkrim – ein varsla katastrofe
Det går knapt ein dag utan grove valdshendingar i Oslo. Bak står gjengar og mektige kriminelle nettverk som har vakse fram dei siste ti åra.