Tidskrift

Jesper Hommefoss Johnsen

jesper@dagogtid.no

Forskingsrådet kunngjorde i siste utgåve av Nysgjerrigper-bladet at papirutgåva no er historie. Vitskapsmagasinet for unge har til no komme ut fire gonger i året.

Frå no av vert alt redaksjonelt stoff flytta til nettstaden deira. Med det mistar 120.000 ungar no lesestoff om forsking på papir. Grunnen skal vere høge kostnader knytte til papir og trykking.

Leiar i Norsk Tidsskriftforening Nana Rise-Lynum meiner det er trist at bladet forsvinn. Spesielt det at det går utover dei aller minste, uroar henne.

– Det er veldokumentert at lesing på skjerm svekkjer læringa. Då er det viktig at det finst tilbod som gjer at barna kan tileigne seg kunnskap gjennom papir, slik at det dei lærer, heng igjen.

Ho peiker på at svekt leseevne forplantar seg vidare i utdanningsløpet.

– Universitetstilsette snakkar alt no om at dei må forenkle stoff, og at studentane slit meir med å tileigne seg vanskeleg materie no enn før. Det er ikkje ei framtid vi kan ønskje for ungane våre.

Rise-Lynum er redaktør for Norsk Barneblad, som driv med vitskapsformidling til barn. Ho seier tidsskriftsjangeren er under hardt press.

– For oss er det berre trist å miste ein konkurrent. Marknaden vert smalare og smalare. Vi konkurrer no hovudsakleg mot skjermen.