Pris til fengsla journalist

Onsdag 3. mai, på pressefridomens dag, fekk den eritreisk-svenske journalisten Dawit Isaak den internasjonale prisen for pressefridom på UNESCOs hovudmarkering i hovudstaden Jakarta i Indonesia, melder Unesco.no. Då Eritrea vart sjølvstendig i 1993, flytte Isaak attende til Eritrea frå eksilet sitt i Sverige, for å bruke journalistikken i det han trudde skulle bli ei demokratisk utvikling. Han og mange andre demokratar vart vonbrotne då styremaktene i 2001 slo hardt ned på uavhengige medium og fri journalistikk.

Siste livsteikn frå Isaak var i 2005. I dag veit vi ikkje kvar han er, men han har truleg sete i fengsel i 16 år utan lov og dom. Det var i 1993 at FNs generalforsamling erklærte 3. mai som pressefridomsdagen (World Press Freedom Day).

CNN nektar å sende Trump-video

Den amerikanske TV-kanalen CNN nektar å kringkaste ein reklamevideo frå Donald Trump, der han klandrar den amerikanske pressa for «uærlege mediefakta». Reklamevideoen vart lansert måndag denne veka, og er ei skryteliste over dei fyrste hundre dagane til Trump som president. Mellom anna vektlegg videoen utnemninga av Neil Gorsuch som domar for Høgsterett, og godkjenninga for Keystone XL-røyrleidningen. Deretter får medium smekk på fingrane fordi dei ikkje har kringkasta desse nyhenda.

«Trump er i gang med å gjera USA stort att, men ein blir ikkje informert om framgangen ved berre å fylgje med på nyhenda», heiter det i videoen. I det dette blir sagt, kjem ei gruppe journalistar til synes i videoen, mellom andre CNNs Wolf Blitzer, og så blinkar det «fake news» over skjermen.

CNN likar dette dårleg, og tek til motmæle på Twitter: «CNN krev at dei falske klagemåla blir tekne bort frå videoen. Pressa viser ingen villeiande nyhende, det er denne videoen som er falsk. Vi fylgjer våre retningsliner her: Videoen vil fyrst bli godteken til kringkasting når desse bileta blir sletta. Det er eit faktum.»

Radiohead fyller år

Albumet OK Computer slo an i 1997. Bak stod det britiske rockebandet Radiohead. OK Computer var eit av dei mest kritikarroste og populære plater det året. No fyller albumet 20 år, noko som blir markert med ei nyutgjeving av klassikaren. Plata kjem no ut i ny «remastra» utgåve med b-sider og – til glede for fansen – tre tidlegare uutgjevne låtar. Plata har fått namnet OKNOTOK og blir sleppt 23. juni 2017 via XL Recordings og Playground Music Scandinavia.

ronny@dagogtid.no