Berre dette: Sommar og kjærleik. Men då boka Fanga. Fanga i flukta: for-forelska for-rykte fragment av Øystein S. Ziener (1957–1998) kom ut i 1992, sende NTB ut ei melding som var såpass interessant at de skal få lese: «HOMSEDIKT FRA HEDEMARKEN: En svært spesiell debutantbok med dikt kommer på Aschehoug i begynnelsen av september. Ikke bare er det nokså uvanlig å debutere med en diktsamling på nærmere 200 sider i stort format, illustrert med fotografier, og til en pris som blir høyere enn for diktsamlinger flest. Men enda mer spesielt er nok innholdet: Det er en diktsyklus om homoseksualitet, til og med på nynorsk, med mange allusjoner til homoseksuell litteratur, og med lyriske beskrivelser av et homoseksuelt liv. (…) Iblant velger han hedmarksdialekt og allusjoner til kjent prøysendiktning, som i en bekjennelse om at det finnes homser i Ringsaker mellom steinrøys og strå midt i blåklokkevikua: Itt’n Teodor/ og/ itt’n Valdemar/ men je.»

Øystein S. Ziener var fødd i bygda Vallset i Stange og døydde ved sjølvmord i 1998, berre 41 år gammal. Han var utdanna litteraturvitar, skreiv i fleire aviser, mellom anna her i Dag og Tid, og rakk å utgi fire diktsamlingar, to biletbøker og ei bok om forfattaren Herman Bang, men mest merksemd og åtgaum fekk han altså for den tradisjonsleikande og tematisk banebrytande debutboka, som vekas dikt er henta frå.

Samlinga er delt inn i fire bøker, eller seksjonar, og dette diktet er henta frå «Andre bok/ Coming/ Coming out», som fortel i episodiske dikt om eksistensiell og seksuell oppvakning, frå tidleg barndom til ungdomstid, og om å kome ut av skapet i Bygde-Noreg. Det er stundom kjenslevart, sårt og brutalt, men oftare er det prega av ei opprømt og overskotsprega tone. Eit kraftig fråspark frå ein forfattar vi gjerne skulle hatt lenger i landet.

Cathrine Strøm

berre dette:

i sommarnattleg

løyndom

oppå Lauvåsen

å snurre

fem av håra

på brystet ditt

rundt pekefingeren

rundt

og rundt

og rundt

medan

bivringa

på jordbærleppene dine

den korte pusten din

fortel meg

at du drøymer

lukkeleg og sukkersøtt

om heile verda

som er full

av andre gutar

enn meg

himmelen raudnar

og likevel vite

at det er meg

du drøymer om

å vakne

opp til

inntil

Øystein S. Ziener