Besøkssenter til Olav digre

Hausten 2016 kom arkeologar over ein sensasjon: Dei fann det som truleg er restane av Klemenskyrkja til Heilag-Olav. Funnet vart gjort i Søndre gate i Trondheim sentrum, og i vår tok dei arkeologiske etterrøknadene til att. Det er Norsk institutt for kulturminneforskning (NIKU) som står for undersøkinga. No har regjeringa òg ytra entusiasme over funnet: Dei vil løyve 31 millionar kroner til arbeidet, men pengane skal attåt gå til reising av eit visingsrom med formidling av soga om kyrkja. Ikkje berre det: Det skal etablerast eit besøkssenter i underetasjen på næringsbygget som skal stå på tomta, der ruinane av kyrkja og andre funn frå den arkeologiske utgravinga skal bli presenterte.

Oscar-vinnar i iransk valkamp

Den iranske filmregissøren Asghar Farhadi (f. 1972) er kanskje mest kjend for filmen Nader og Simin – et brudd frå 2011, som han mellom anna vann Gullbjørnen, Oscar for beste framandspråklege film og Golden Globe for beste framandspråklege film for. I februar vann han sin andre Oscar for den fransk-iranske filmen Fortiden. No har han engasjert seg i valkampen i heimlandet. Han har gått ut med ein offentleg appell, der han oppmodar landsmenn til å røyste på den mest reformviljuge presidentkandidaten, Hassan Rouhani, som har som program å setja opp eit charter for sivile rettar, styrkje økonomien og gjera tilhøva til Vesten betre.

«Eg vil røyste på Dr. Rouhani, og eg vonar at dei som enno ikkje har bestemt seg, brukar den grunnleggjande retten dei har, og røyster – trass alle forståelege grunnar – med omsyn til lagnaden til borna i heimlandet vårt og til framtidige ættleder.»

Presidentvalet i Iran skjer same dag som avisa du no har framfor deg, kjem ut.

The Hunger Games blir teater

Mange har fått med seg fascinasjonen for The Hunger Games – ein boktriologi av Suzanne Collins, med action, science fiction og eventyr som ingrediensar. Bøkene er filmatisert, og fekk då tittelen The Hunger Games – Dødsleikane. No kjem teaterversjonen. Det er planar om å byggje ein heilt ny teaterbygning for framsyninga ved Wembley Stadion i London, og kjende musikarar er hyra inn til prosjektet. Det britiske rockebandet Radiohead har fått i oppdrag å laga musikk for teaterversjonen.

ronny@dagogtid.no