I sommar har ca. 100.000 norske barn drive aktiv våpentrening. Derfor har mange foreldre høyrt følgande altfor mange gonger i «ferien»: «Eg skyt deg!», «Ikkje skyt meg!», «Ho skaut meg!», «Slepp meg inn!», «Slepp meg ut!», «Eg kjem uvæpna!», «Eg skal ikkje drepe deg!», «Mamma, han skaut meg i hovudet!», «Han drap meg først!», «Ikkje drep meg!» osv.

Noko vi foreldre har uttalt altfor mange gonger i «ferien», er: «Legg frå dykk våpena!», «Rydd opp alle dei 400 kulene!», «No er det nok!», «Du skyt ikkje meg!», «Au!» osv.

Uansett vil vi foreldre takke våpenprodusentane, ikkje minst Nerf, for å ha bidratt med avlasting og eit treningstilbod til barn i sommar. Vi håpar de reklamerer for produkta dykkar i forkant av neste sommar òg, slik at ungane bruker sparepengane sine på våpen og ammunisjon framfor syklar, rulleskøyter, gummibåtar og anna barnsleg tøys.