Ja ja, sann. Endeleg har eg vore ute og reist litt att. Denne gongen til landsbyen Haworth i West Yorkshire, heimstaden til dei ganske så kjende Brontë-søstrene (Charlotte, Emily og Anne), som alle også blei kjende forfattarar, særleg dei to første. Og no skal ein heller ikkje gløyme broren, Branwell, som også var talentfull, men skusla vekk talentet med litt for store mengder alkohol og opium. Eg og reisefølgjet mitt gjekk gjennom prestegarden der dei voks opp (og som no sjølvsagt er eit svært fint museum) og tenkte litt over lagnaden til desse talentfulle presteungane (tre av dei døydde då dei var rundt 30, berre Charlotte blei nokre år eldre). Men – ikkje berre dreiv dei med litteratur og målarkunst og musikk, dei var også opptekne av dette med øl. At ølet skulle vere godt, var ein slags kongstanke. Noko dette bildet skulle illustrere på ein framifrå måte.