Den siste tida har nyheitene vore prega av den trakasserande meldinga som Liv Signe Navarsete mottok for to år sidan. Ti senterpartistar i den trønderske fraksjonen var på hyttetur, og i løpet av turen vart det sendt ei upassande melding. Vi har altså ti mistenkte, men få spor å gå etter. Kven er betre til å løyse slike oppgåver enn Hercule Poirot?

Dessverre fekk vi ikkje tak i meisterdetektiven på så kort varsel, men til stades i matvogna på Trønderbanen har vi den norske avløysaren Raphaël Poirée, i tillegg til dei ti politikarane.

Poirée: Mine herrar, takk for at de kunne koma hit i kveld. Eg håpar alle har fått kaffi frå kaffiautomaten. Medan vi nyt utsikta til Trondheimsfjorden og dei frodige trønderåkrane, skal vi finne ut kven som sende den giftige og slu meldinga til madam Navarsete.

Alle: ?

Poirée: Alle hadde motiv og moglegheit til å sende meldinga. Éin av dykk stod som avsendar. Det ville jo vore veldig utspekulert å sende meldinga i sitt eige namn, for ingen ville sendt noko slikt frå sin eigen konto, og dermed ville ein automatisk sleppe mistanke.

Alle: Men ...

Poirée: Stopp! Og du, monsieur Ola Borten Moe, hadde ikkje du vore i ein langvarig maktkamp om sentrale leiarverv i partiet? Ville det ikkje vore naturleg for deg å sende ei slik sleivete melding for å skade erkefienden?

Ola Borten Moe: Herregud, eg ville jo vore den fyrste alle mistenkte. Når er neste stasjon?

Poirée: Dette toget stoppar ikkje før Steinkjer. Og du ...

(Det vibrerer i telefonen til Raphaël.)

Poirée: Oi, eg fekk ei melding. Vent litt. Det er frå eit skjult nummer. Det står: «Det var autokorrekturen som slo inn. Vi ville berre skrive ’Vi har lyst på hytta di.’»

(Alle dei ti mistenkte sit med telefonen i handa.)

Poirée: Kven sendte denne meldinga????

(Toget køyrer på ein elg og sporar av.)