Mange lesarar er opptekne av vêret. I Klok-redaksjonen tek me publikum på alvor, og difor sender me kvar sommar ein medarbeidar ned til Middelhavet for å undersøkje om vêret i Liguria er noko å skrive heim om. Tilfeldigvis vart det også denne gongen boklækjaren som fekk den ansvarstunge oppgåva. Ingenting nytt under sola der, altså.
I Italia har det vore varmt både i vêret og i vatnet. Når temperaturen i havet ligg kring 29 °C, er det ikkje nok med eit bad for å kjøle seg ned. Dessutan seier folk med forstand på sveitting, at å sveitte fører til væsketap i kroppen. Slik kom eg fort fram til at ein kafé med klimaanlegg og iskald kvitvin kunne vere ei god løysing. Der vart eg sitjande til sola gjekk ned. Fortsetjinga på forteljinga om denne dagen vert verande i Liguria.
Frå drukkenskap til forfattarskap og til løysinga på oppgåve 1538. Gunder Runde skriv: «Prosedyre ved dagens Kpb: Lese utdraget (sakte) tre gongar. Ingen merkbar reaksjon i det etter kvart vaklande minneområdet i hjernen. Vurdere (spontant) aktuelle novellistar: bokmål, ikkje døde før år 2000. (Askildsen, Herbjørnsrud, Stien, Lindstrøm – ingen av desse passar inn). Dermed må det meir målretta arbeid til. Wikipedia har ei nettside over ’norske novellister’, ho inneheld 172 namn. Tilsynelatande uoverkomeleg, men ikkje fullt så gale når eg kuttar ut nynorskbrukarar og folk døde før år 2000. I tillegg hoppa eg over totalt ukjende namn. Tok ein liten pause halvveges (etter bokstaven L) – til då hadde eg funne berre 3 aktuelle kandidatar: Odd Klippenvåg, f. 1951 (Lagerkvist), og to stykk fødde i 1974 (Eyvind Johnson), nemleg Ingeborg Arvola og Bjarte Breiteig, alle desse har utgitt ei novellesamling i år 2000. BookBites har berre ei av desse samlingane tilgjengeleg, nemleg Surrogater av Bjarte Breiteig, som viste seg å vere innertiar. Novella heiter ‘For bikkja til Ronny’. Ronny er altså han som er nemnd i utdraget som Halvorsen, og som kjem tilbake på jobb etter ei eller anna hending som det ikkje må snakkast om (mislukka sjølvmordsforsøk etter brot med kjærasten). I løpet av eit drikkegilde fortel Ronny om (den namnlause) hunden sin (som var ein labrador, og som han måtte skyte fordi kjærasten hans var allergisk mot hundehår). Karane skålar i fellesskap ‘for bikkja til Ronny’, som altså har gitt namn til novella. Ei særs god novellesamling, som eg då sjølvsagt las. Surrogater var m.a. nominert til Brageprisen. Breiteig har gitt ut fleire novellesamlingar, debuten hans, Fantomsmerter (1998), har eg ståande i hylla mi. Breiteig er frå Kristiansand, har studert både fysikk og litteratur og har gått Skrivekunstakademiet i Hordaland.»
John Olav Johnsen skriv: «Hunden i novella ‘For bikkja til Ronny’ er ein labrador. Forfattaren heiter Bjarte Breiteig og tittelen på novellesamlinga er Surrogater. Gode noveller. Breiteig kan kunsten. Ein skimtar Hemingway og Lønn i bakgrunnen.»
Viggo Østebø skriv: «Løysinga må vera ein av dei beste nolevande novelleskrivarane i Noreg: Bjarte Breiteig.»
Desse leita seg fram til labradoren og til løysinga på oppgåve 1538: Signar Myrvang, John Olav Johnsen, Eli Winjum, Laurits Killingbergtrø, Ragnhild Eggen, Vigdis Hegna Myrvang, Nils Farstad, Bjørn Gjermundsen, Ingebjørg Sogge, Skeisebibliotekaren i LASK, Marit Gimnes, Janneken Øverland, Aning og Dreis, Per Trygve Karstensen, Olav Holten, Fritjof Lampe, Petter Kristensen, Inger Anne Hammervoll, Ole Husby, Kjell Helge Moe, Pål Amdal, Gunnlaug og Tor Inge på Gullhaugen, Gunder Runde, Jan Alfred Sørensen, Else Gjesdahl Sørensen, Bjørn Myrvang, Erik Aamlid, Arne Thorvik, Eli Hegna, Gunnar Bæra, Camilla Høvik, Ole G. Evensen, Eli Winjum, Folke Kjelleberg, Jorunn Øxnevad Lie, Brita Lundeland, Viggo Østebø, Eirik Holten, Jorunn Brekke Fjeldheim, Sigrun Gjengedal Ruud, Audun Gjengedal, Robert Øfsti, Inger Margrethe Berge, Ingeborg Helvik, Reidar Birkeland, Tone Bjørnsen, Gunnar Eide, Knut Einar Johannessen, Marit Skytterholm, Yngve Skjæveland, Sissel Gunnarshaug, Torleik Stegane og Sjur Joakim Fretheim. Denne gongen heiter bokvinnaren Janneken Øverland. Gratulerer!
Digital tilgang – heilt utan binding
Prøv ein månad for kr 49.
Deretter kr 199 per månad. Stopp når du vil.
