Her i bokstova er me mektig imponerte over kor mange klokingar det finst i lesekrinsen til Dag og Tid. Heile 38 godkjende svar fekk me på Hamsun-kvissen som var siste oppgåva i fjor. Kor mange timar folk har brukt på å gruble og lese seg opp på forfattarskapen til Store-Knut, veit me naturleg nok ikkje. Men ifylgje ei åtvaring frå finansministeren vert bruttonasjonalproduktet i Noreg sterkt svekt når det er kviss med Knut. Gråt meg ei elv, Vedum.

Som ei påskjønning til alle lesarane som er glade i Hamsun, og til glede for nye lesarar, vil me nok ein gong presentere ei røvarhistorie frå røynda. Denne gongen med slips: Det var laurdag den 11. desember 1920 at Knut Hamsun mottok nobelprisen i litteratur i Stockholm. Han budde på Grand Hôtel Royal saman med kona Marie, og Store-Knut var i festhumør på banketten etter prisutdelinga. Det var mange som ville skåle, og Hamsun skåla med. Seint på kvelden hadde Marie forgjeves forsøkt å få nobelprisvinnaren med i seng. Til sist gjekk ho aleine opp på hotellrommet. Då Albert Engström og ein kelner på morgonkvisten kjem slepande med Knut til rom 317, er han så påsegla at det er umogleg å få av han gallaantrekket. Marie får teke slipset av mannen sin, men no søv Hamsun tungt på sofaen, og ho lèt han liggje.

Det går over kyrkjetid før Knut vaknar på sofaen i Stockholm sundag 12. desember. Og han vaknar til ei kone som står der med hovudet bøygd, Marie er langt ifrå nøgd. Ho vil skjelle han ut, og byrjar med å påpeike at han var så full at korkje Engström eller ho fekk av han dei fine kleda før han fall i svevn. Då kjem det frå Store-Knut: «Kjære, har jeg ligget hele natten uten slips!»

Blant dei mange fine svara denne gongen vil me trekkje fram måten Ole G. Evensen presenterer ei pedagogisk løysing på. Evensen har med tittelen på alle verka me hadde henta gåtene ifrå, og han skriv:

«1 Frå Redaktør Lynge: namn på politisk parti som redaktør Lynge er tilhengjar av: Venstre.

2 Frå Sult: namn på gata der episoden på trappa går føre seg: Pilestrædet.

3 Frå Victoria: føre- og etternamn på ho som har gjeve Johannes sigarett-etuiet: Camilla Seier.

4 Frå Markens grøde: farge på grisungen Isak bar med heim frå Sverige: gul.

5 Frå Mysterier: duft av innhald i flaska med gift: mandel.

6 Sitatet «Mig har tiden tæret på…» er frå En vandrer spiller med sordin.

7 Frå Pan: førenamn på han som reddar skoen frå å drukne: Jacob.

8 Frå Paa gjengrodde Stier: namnet på skulelæraren som lærte Enevoldsen å spele orgel: Hans Næss.

9 Frå Rosa: baronessa sin ’fødestad’: Finland, førenamn på baronessa: Edvarda.

10 Frå Sværmere: tilnamn på skuffa ung kvinne: jomfru Fan los, førenamn på jomfru van Loos: Marie.»

Om Hamsun-kvissen skriv Inge Strand: «Artig hjernetrim i romjula!»

Klok-redaksjonen seier takk for alle trivelege helsingar til jul og til nyttår. Eit døme på vellæte kunne vere Eli Winjum, som skriv: «Takk for mange gode lesetips og oppgåver i året som gjekk!»

På oppgåve 1608 var det desse som var kloke på Knut: John Olav Johnsen, Ellen Lian, Eli Winjum, Kjell Helge Moe, Signar Myrvang, Gunnar Sanderud, Aase Tveitan Hutchison, Gunder Runde, Per Trygve Karstensen, Bjørn Myrvang, Vigdis Hegna Myrvang, Hallgeir Dale, Ingebjørg Sogge, Sissel Gunnarshaug, Eva Stordal, Gunnlaug og Tor Inge på Gullhaugen, Ragnhild Eggen, Eli Hegna, Inge Strand, Sjur Joakim Fretheim, Folke Kjelleberg, Dag Skarstein, Inger Anne Hammervoll, Skeisebibliotekaren i LASK, Per G. Sletten, Reidar Birkeland, Ole G. Evensen, Hege Faust, Ingerid Skarstein, Nils Farstad, Viggo Østebø, Anne Siri Strand, Brita Lundeland, Gunnar Eide, Inger Margrethe Berge, Bjørg Ladehaug, Laurits Killingbergtrø og Roy Mesics. Bokvinnaren på Hamsun-kvissen heiter Per G. Sletten. Gratulerer!

Klok på bok 1610

– Det er vårstorm ute.

– Snøen smelter når det regner.

– Det gjør den, det skal være sikkert, men hjertet, det smelter ikke, eller hva mener du.

– Synden smelter ikke.

Sitatet er frå s. 174 i boklækjarutgåva (2001). På originalspråket kom romanen ut i 1967. Me skal fram til ein forfattar som var fødd i eit skotår, og som døydde i eit år då Nordisk råds litteraturpris gjekk til ein svensk forfattar. Ein av bipersonane i boka er farmasøyt, og før eg godkjenner svaret, vil eg vete namnet på kona til denne pilletrillaren. Send namn på kone til farmasøyt, namn på forfattar og tittel på verk til klok@dagogtid.no. Svarfristen er til og med 20. januar.

Medikus