Svaret på tittelen i dag er sjølvsagt nei, får får ikkje får, dei får lam. Denne gongen vert det mykje ull og lite skrik i spalta du les no.

Men fyrst vil me minne om nobelprisundersøkinga der lesarane er inviterte til å komme med framlegg om forfattarar som fortente, men ikkje fekk, den noble litteraturprisen i åra mellom Undset og Fosse. Me har alt fått mange gode innspel, men det er framleis plass til fleire. Fristen for å sende inn namn på forbigåtte forfattarar til klok@dagogtid.no er til og med 11. november. Alle som deltek i undersøkinga, er med i trekkinga av ein bokpremie.

Det er nok ikkje berre boklækjaren som kunne tenkt seg å vete kva for forfattarar som opp gjennom tidene har vore nominerte til den gjæve prisen. Men svenskane er strenge. På heimesida til Svenska Akademiens Nobelkommitté står det: «Nomineringslistan lyder en femtioårig sekretessgräns och kommer inte att publiceras tidigare än så.»

Klok-redaksjonen har snoka litt i systema og kan avsløre at følgjande norske forfattarar var nominerte i åra mellom 1928 og 1950: Johan Bojer, Olaf Bull, Olav Duun, Alf Larsen, Ole Hallesby, Ewald Sundberg, Hans Henrik Holm, Johan Falkberget, Arnulf Øverland og Tarjei Vesaas. Mange fine folk på lista, men utan å nemne namn, Hallesby, Sundberg og Holm, var det nok òg nokre av dei som De Aderton neppe tok særleg seriøst.

Løysingsforfattaren denne veka har vore heit kandidat til Nobelprisen i litteratur i ein lengre periode. Tor Fjeldstad skriv: «Eg er ikkje så klok på bøker, men eg plar å følgje med når kona mi prøver å finne løysinga. Denne gongen vart eg på eit vis fanga av sitatet. Medan vi sat ved frukostbordet og funderte, bestemte eg meg for å prøve om Nasjonalbiblioteket kunne hjelpe meg. Der fekk eg napp, og då skjøna eg kvifor sitatet hadde fanga meg. Murakami er ein av mine favorittar. Men denne boka hadde eg ikkje lese. Så då måtte eg setje gang, og på side 181 fann eg hotell Delfinen. Eg las spent vidare, og på side 202 kom løysinga. Eigaren fortalde at hotellet har namnet sitt etter ein episode med delfinar i Moby Dick av Hermann Melville. Boka sitatet er henta frå, er Sauejakten av Haruki Murakami.»

Laurits Killingbergtrø skriv: «Med velprøvde søkjemåtar ut frå tipsa kom eg fram til ei sannsynleg bok: Sauejakten av Haruki Murakami. Men å få verifisert framlegget mitt var verre, for boka eg trudde på, finst ikkje på biblioteka her. Men ho er lesbar på nettet, fann eg ut, og der stod sitatet. Dermed kunne eg sitje i ro og mak framfor datamaskina i inneklede og nyte den gode forteljinga.»

Gunnlaug og Tor Inge på Gullhaugen skriv: «Må vedgå at Murakami er ein yndlingsforfattar, men forstår godt at De Aderton ikkje vil lese opp namnet hans. Både i Sauejakten og kanskje dei fleste av bøkene til Murakami er det fasinerande å sjå korleis kattar og menneskeøyre er eit stort, stort tema som han maktar å trylle heilt naturleg inn i teksten.»

John Dag Hutchison skriv: «En meget god oversettelse fra engelsk av Kari og Kjell Risvik. De får frem det ofte lyriske i beskrivelser og detaljer Murakami leker seg med. Herlig bok.»

Robert Øfsti skriv: «Alltid ei glede å få i oppgåve å lese Haruki Murakami.»

På oppgåve 1599 var det ingen svarte får blant desse innsendarane: John Olav Johnsen, Signar Myrvang, Eli Winjum, Paul Henrik Hage, Ole G. Evensen, Nils Farstad, Skeisebibliotekaren i LASK, Jon Grepstad, Ragnhild Eggen, Per Trygve Karstensen, Ingebjørg Sogge, Vigdis Hegna Myrvang, Eli Hegna, Laurits Killingbergtrø, Ole Husby, Inger Anne Hammervoll, Ragna Barkve, Jan Alfred Sørensen, Fritjof Lampe, Lise Haaland, Bjørn O. Bjørnsen, Jorunn Øxnevad Lie, Audun Gjengedal, Gunder Runde, Jorunn Røyset, Reidar Birkeland, Robert Øfsti, Olav Holten, Nina Korbu, Gunnlaug og Tor Inge på Gullhaugen, Sigrun Gjengedal Ruud, John Dag Hutchison, Marta Kløve Juuhl, Kjell Helge Moe, Bjørn Myrvang, Tor Fjeldstad, Gunnar Eide, Eirik Holten, Inger Margrethe Berge, Torleik Stegane og Erik Aamlid. Bokvinnaren heiter Ole G. Evensen. Gratulerer!

Klok på bok 1601

Under ei barlind som skygge skjenkjer

sit uglene tett i lag,

lik gudar av framandt slag

med borande blikk. Dei tenkjer.

Sitatet er frå s. 111 i boklækjarutgåva (2014). På originalspråket kom boka ut fyrste gong i 1857. Me skal fram til ei diktsamling som, utan skugge av tvil, vert rekna som ein klassikar. Forfattaren døydde før Nobelprisen i litteratur kunne komme på tale. I sitatet er det uglene forfattaren tek føre seg, men før eg godkjenner svaret, vil eg vete kva for stormfugl som har gjeve namn til eit anna dikt i samlinga. Send namn på stormfugl, namn på forfattar og tittel på verk til klok@dagogtid.no. Svarfristen er til og med 11. november.

Medikus Libri