Det er seinsommar, og kan hende finst det folk i lesarkrinsen som trur at no er det berre gråt og illelåt i bokstova. Slik er det heldigvis ikkje. Stemninga er lettlyndt, og framleis er det sommarkjole eller shorts, sandalar eller berrføtt, som er kodane når Klok-redaksjonen dressar seg opp til arbeid.

Tidlegare har eg vore innom at seinsommar er eit diffust omgrep. For å få orden i sysakene, og slik at ein ikkje treng ta det opp att meir, arrangerte eg ei avrøysting om dette ein kveld eg var aleine på kontoret. Det viste seg at alle med røysterett ville at seinsommaren i år skulle vare til haustjamdøger, altså fredag 23. september. Så fekk me det på plass.

Det var mange som fann fram til fasiten denne gongen. Boklækjaren seier seg samd med Synnøve Kåset, som gjer merksam på at svaret på tilleggsspørsmålet «ikkje må røpast for den som ikkje har lese bokji». Eg har difor ikkje tatt med den delen av oppgåva når me no skal sjå på nokre av svara me fekk på Kpb-1540.

Norunn Askeland skriv: «Der hadde eg flaks. Dette sitatet kjende eg igjen med det same. I sommar hadde eg sett meg føre å lese romanen Fiskehuset av Stein Torleif Bjella. Eg er eigentleg ikkje så interessert i fisking at eg vil lese ei heil bok om det, men heldigvis var det ikkje ei tjukk bok, og heldigvis handla ho om mykje meir enn fisking, men eg lærte no faktisk litt om fisking også. Både forteljaren Jon Aslesson Aal og forfattaren Stein Torleif Bjella er fleirsidige, på den måten at dei syslar med både skriving og musikk. I sitatet frå romanen fell det kloke ord om både identitet og kjærleik. Det skjer i samtale mellom forteljaren Jon og eigaren av fiskehuset, Ivar. Han av alle er frekk nok til å fortelje om kva som skal til for å lukkast i kjærleikslivet. Ja, ja. Ein kan prøve, den som vil: Ivar seier at ein må ta fullt ansvar for alt og innsjå at ein ikkje er den viktigaste. Ein må ta ansvar ikkje berre for hus og heim, men òg for stemning og tone i forholdet. Då får ein altså varme og eit godt og langt liv. Kloke ord som like gjerne kunne ha vore med i vigselritualet i kyrkja. Men kyrkja vil nok ikkje ta med siste del av sitatet, der det står at om du har gjort alt rett og ikkje får noko attende, er det ikkje verre enn at du får finne deg ei ny dame. Den sat, tenkjer eg. Ei fin bok om det å fiske og det å leve.»

Marte Myklebust skriv: «Denne tok eg på fyrste setning. Eg las nemleg akkurat denne passasjen høgt til mannen min på sengekanten ein kveld. Kvifor eg valde akkurat denne, skal eg ikkje spekulere vidare om! Ei særs god bok som eg hadde stor glede av å lese!»

Hilde Frigstad skriv: «Så kjekt at du trekker frem denne boka, den er utrolig bra!»

Astrid Wikstrøm skriv: «To karar, ein gamal og ein ung ved eit fjellvatn, i ei fiskehytte, i ein robåt. Ei heil veke saman. Ei stor og leseverdig forteljing med ein overraskande slutt.»

Roger Hestholm skriv: «Ei svært fin bok.»

Truleg hadde desse det som fisken i vatnet medan dei leita fram løysinga på oppgåve 1540: Signar Myrvang, Eli Winjum, John Olav Johnsen, Ragnhild Eggen, Laurits Killingbergtrø, Arne Thorvik, Linda Otneim, Ole Petter Jupskås, Erling Ove Flø, Inger Anne Hammervoll, Audhild Rygg, Ole Husby, Ole Jakob Totland, Roger Hestholm, Ingmar Lid, Gunder Runde, Kari Ingebjørg Todal, Ingebjørg Sogge, Jan Alfred Sørensen, Else Gjesdahl Sørensen, Kjell Helge Moe, Marit Vardehaug, Brita Lundeland, Norunn Askeland, Hilde Frigstad, Marte Myklebust, Reidar Birkeland, Petter Kristensen, Eli Hegna, Pål Amdal, Viggo Østebø, Per Trygve Karstensen, Gry Nesse, Knut Einar Johannessen, Yngve Skjæveland, Hallgeir Dale, Ingunn Bergem, Fritjof Lampe, Audun Gjengedal, Gunnar Eide, Nils Farstad, Astrid Wikstrøm, Egil Ask, Gunnlaug og Tor Inge på Gullhaugen, Lars Tarald Myrum, Marianne Hoff, Else Moen Rygg, Jorunn Brekke Fjeldheim, Synnøve Kåset, Folke Kjelleberg, Jarle Fanebust, Marta Kløve Juuhl, Gunnar Bæra, Sigrun Gjengedal Ruud, Jorunn Øxnevad Lie, Dei Kvasse på Fana, Tone Bjørnsen, Inger Margrethe Berge, Gudlaug Nedrelid, Aning og Dreis, Robert Øfsti, Aud Thue, Sjur Joakim Fretheim, Mari Vannes og Ole G. Evensen. I dag heiter bokvinnaren Tone Bjørnsen. Gratulerer!

Så til eit spørsmål frå Audun Gjengedal. Han skriv: «Kan ein kalla det ei oppleving at ein sit i ein god stol og berre les?» Svaret på spørsmålet er ja.

Klok på bok 1542

En gang sa faren min noe jegskulle ønske han aldri hadde sagt. Han sa: Hør her, mitt hjerte, du klarer deg, du er en som klarer seg, men du har en skyggesøster som er redd, som fordufter bare noen puster på henne. Hun trenger deg.

Sitatet er frå side 236 i ein roman som kom ut i 2021. Me skal fram til ein forfattar som er fødd i eit år då Nordisk råds litteraturpris gjekk til ein svensk forfattar. Løysingsforfattaren har òg motteke fine prisar og utmerkingar. Send namn på forfattar og tittel på verk til klok@dagogtid.no. Svarfristen er til og med 27. august.

Medikus Libri