Frå Hjallis’ beste 10.000-meter i 1949 til Håvard Bøkkos noregsrekord på same lengd i dag har tida gått ned nærare tre og eit halvt minutt. Det er sjølvsagt ikkje berre utstyret som er avgjerande her, men nokre sekund er det nok likevel å hente på vegen frå ull til nylon.

For på biletet ser vi Hjallis kledd i eit lite aerodynamisk skøyteantrekk, eit forseggjort blått ullsett. I tillegg til at ullstoffet er tjukt, er ikkje kleda tettsitjande. Lua sit høgt på hovudet, og hanskane er store som vottar. Skøytene Hjallis har på seg, er ikkje klapp, det vil seie at heile jernet sit fast i skoen. På klappskøytene, som kom i 1990-åra, heng bare fremre del av jernet fast. Ein større del av jernet er lenger i kontakt med isen, og slik blir fråsparket meir effektivt.

Bøkko har klappskøyter. Han voks også opp i ein heilt annan aerodynamisk liga. Då han og dei andre på landslaget gjekk frå raud til blå nylondrakt, vart det mange spekulasjonar kring draktvalet. Utviklarane hevda nemleg at det blå fargestoffet som vart tilført, påverka dei aerodynamiske eigenskapane i stoffet. No snakkar vi altså ikkje lenger om sekund, men om tidelar.

Maren Bø

Maren Bø er idrettspedagog og frilansskribent.