På ferie i Roma lærte eg at det finst foreldre som ikkje lar ungane gå på fotball. For dei såkalla intellektuelle fedrane var sporten rett og slett for harry. 

I Noreg takkar og bukkar me om barnet vil drive med ein eller annan sport. Eller det er nok ikkje heilt sant, det finst også her visse preferansar for kva me aller helst vil at barna våre skal drive med. Å køyre minsten til poledancing sit nok langt inne for dei fleste. 

Fotball har forresten ikkje alltid vore like stas i Noreg heller. Det er faktisk ikkje meir enn 30 år sidan det nesten ikkje fanst fotballpubar her til lands. Dersom du skulle sjå ein kamp ute, var det i tilfelle snakk om ein ganske mørkebrun stad, der folk har faste bord. Og når ein snakkar om idrett på pub: dart, shuffleboard og biljard, sportane som ein kan drikke øl til, har jo teke heilt av dei siste åra. 

I går ramla eg innom eit meisterskap i vektløfting. På høgtalarane dundra Rammstein. Temaet var mørkt og flammande, totalt ulikt den fotballcupen eg eigentleg var deltakar på, ved sida av. Av ein eller annan grunn kjennest det meir harry å trene på seg store musklar enn dei meir uthaldande. 

No kan nærast alle gå på fotballpub, men kan alle gå på bodybuilding- og fitnesstemne? 

Foto: Lise Åserud / NTB og Efrem Lukatsky / AP / NTB

 Kjekkare enn å spørje kunstig intelligens er det å finne ut kva Kvinneguiden.no meiner om harry sport. I tråden «Hvilken hobby er Harry i 2023» finst sjølvsagt alt, og fyrste forslag er trening. Altså ser vedkommande på trening generelt som harry. Vidare blir bilsimulator heime på storskjerm nemnd. Til slutt er det ei som skriv at det er dei som les Kvinneguiden, som har ein harry hobby.

Maren Bø

Maren Bø er frilansskribent og idrettspedagog.