Futsal er ein av innandørsidrettane som veks mest i verda. Til no har det likevel gått litt sakte i Noreg, kanskje fordi me i landet vårt har god plass å boltre oss på. Liten plass å spele fotball på var nemleg ein grunn til at sporten fyrst vart så populær i Sør-Amerika, heilt tilbake på 1930-talet. Spesielt i São Paulo i Brasil tok sporten av, Pelé var til dømes ein aktiv futsalspelar.

Fem mot fem på ein handballbane. Raskt spel, høgt tempo og kjappe byte. Viss ein ser vekk ifrå Holmenkollstafetten med Dag og Tid, har i alle fall ingen idrett gitt meg høgare innbytarpuls enn futsal. Kombinasjonen av høg intensitet, tørr innandørs luft og tidlege kampar laurdag morgon gjorde dei fyrste minutta svimlande. Kampane varer heller ikkje lenger enn 20 minutt per omgang, så då pulsen var der han skulle vere, var kampen brått over. 

I år startar Heimdal vidaregåande skule opp ei toppidrettslinje i futsal, som fyrste skule i landet.

Foto: Kjersti Lie

Når vi har snakka om futsal i Noreg, har det ofte handla om at sporten gav eit godt grunnlag for «ekte» fotball på gras. Kanskje inntil no: Sesongen 2022–23 var det ein enorm vekst i påmelde lag. No i januar fekk me landslag for kvinner, i tillegg til herrelandslaget som har eksistert sidan 2010. I Noreg kan ein enno ikkje leve av å vere futsalspelar, men i Sverige og Danmark er det mogleg.

I media ser vi lite av den underhaldande sporten. Det er likevel éin stad sporten får skine, også i Noreg: på mobilen, i alle appane med dei korte videoane du kan skrolle deg galen av. Den siste videoen som dukka opp hos meg, var faktisk av nonner som spela futsal. Fantastisk lynkjapp nonne-tiki-taka-fotball.

Maren Bø

Maren Bø er frilansskribent og idrettspedagog.