Sports Club Sarpsborg Helsesenter starta opp i 1981 og skal vere det eldste treningssenteret i Noreg. Det fanst stadar å trene før den tid, men då mindre treningsrom fulle av testo og anabole steroid. Sidan det ikkje var vanleg at kvinner trena i studio, hadde klubben i Sarpsborg eigne dame- og herredagar, og etter kvart vart kjønna fordelte i kvar sin etasje. Ifølgje heimesida deira førte kjønnsdelinga til at folk lest som dei gjekk feil både i etasjar og i garderobar for å smugkikke. 

Sjølv om damer og herrar no stort sett kan trene om kvarandre, finst det ennå kjønnskutyme på mange treningsstudio. Det er til dømes vanlegast å sjå kvinner på ellipsemaskin og menn i styrkekroken. På treningstimar som yoga, step og dans er det òg mest damer å sjå, mens det i spinning og kampsport kan vere motsett. 

Fitness24seven og eit par andre senter skil seg ut og har valt å ha eigne avdelingar for jenter. Dei skriv at alle skal kjenne seg komfortable mens dei trenar. At senteret er døgnope og ikkje alltid bemanna, har nok noko med saka å gjere. 

Med det er me faktisk tekne tilbake i tid. Det kan vel ikkje sjåast på som ein menneskeleg siger at kvinner og menn har problem med å trene saman, uansett grunn. På same tid har nok mange kjent seg litt usikre idet dei entrar testohjørnet for å hente eit par sjukilosmanualar – utan at dette må ha noko å gjere med kva kjønn dei er. 

Viss det å skilje kjønn gjer at fleire kjenner seg trygge og kjem seg på trening, har det noko for seg. Det gjeld berre å ikkje skape ein så stor av avstand at det heile vert for spanande og folk byrjar å gå «feil» igjen.

Maren Bø

Maren Bø er idrettspedagog og frilansskribent.