Mat
Þorrablót!
Islandsk tradisjonskost, ovanfrå og ned: tørka sauekjøt, lammetestiklar, leverpølse, blodpølse, surhai og smalahovud. Til høgre rugbrød og flatbrød.
Foto: The blanz / Wikimedia Commons
Min fyrste tur til Island var eit helvete. Det er metaforisk meint, for målet med ekspedisjonen var å gjere opptak til ein TV-pilot med helvete som tema.
Vi sprang rundt i det ganske spesielle lavalandskapet medan det rauk kraftig rundt øyra på oss, men Hinmannen var ikkje å sjå – han bur nok ein annan stad. Eg tippar USA.
Ein kveld banka vi på døra til den store kitschmalaren Odd Nerdrum, som like godt hadde kjøpt det gamle biblioteket i hovudstaden og flytta inn der med sin familie 2.0, og mi dåverande kone løfta straks den to meter høge Nerdrum opp og bar han rundt i kjøkkenet.
Meisteren tok det med godt humør, og når Öde og dei andre kjortelkledde små kjerubane var i seng, kom det brennevin på bordet, og vi fekk omvising i atelieret. Det vart ei sein natt, der vi blei grundig opplærte i heile det filosofiske grunnlaget rundt kitsch kontra kunst. Vi hugsar i alle fall brotstykke av det.
Starten på neste islandsbesøk baud på nokre overraskingar. Eg var på ein konferanse for kunstnarorganisasjonar, og då drosja nærma seg Reykjavik, var det sett opp sperringar over alt. Det var godt vi hadde ein islandsk kjentmann bak rattet, for det viste seg at dette var den store joggedagen. Absolutt heile landet var på beina, og bilkøyring var strengt regulert, så sjåføren måtte forhandle oss gjennom ei rekke kontrollpostar. Overalt var det springande og prustande menneske, i absolutt alle aldrar og vektklasser.
Om kvelden samla alle seg til utandørs konsert midt i byen, med dei store islandske stjernene på scena, dessverre unntatt Björk. Dagen etter blei vi inviterte til regjeringas drustelege representasjonsbustad, der vi blei traktert med mengder av både vått og tørt, medan kulturministeren i landet spelte eigenkomponerte verk på flygelet. For eit gjennomført fantastisk folkeferd.
Digital tilgang – heilt utan binding
Prøv ein månad for kr 49.
Deretter kr 199 per månad. Stopp når du vil.
