Flytande hotell Norsk cruisefart er eit eventyr i verdsklasse.Før oljealderen kom til Nordsjøen på 70-talet, var «flytande hotell» eit norsk synonym for cruiseskip i heimlege farvatn – eit motstykke til dei «landfaste» hotella. I dag blir ordet «flytande h
Norsk cruisefart er eit eventyr i verdsklasse.
«Stella Polaris» i profil, 5208 brt.
Illustrasjon: Bård Kolltveit
Før oljealderen kom til Nordsjøen på 70-talet, var «flytande hotell» eit norsk synonym for cruiseskip i heimlege farvatn – eit motstykke til dei «landfaste» hotella. I dag blir ordet «flytande hotell» helst assosiert med bustadriggane – «flotella» – som ligg oppankra ved oljefelta. Og medan folk flest reknar med at den norske cruisefarten oppstod i Karibia for femti år sidan, har dei flytande hotella vore årvisse sommargjester her til lands i snart halvtanna hundreår.
Cruisefart som ferieform og Noreg som reisemål for cruiseskip har ei sams historie. Starten let seg faktisk tidfesta. Inspirert av Oscar IIs kroningsferd i 1873, arrangerte Thomas Cook den første organiserte rundreisa til Nordkapp med dampskipet «Præsident Christie» i august 1875. Seinare har cruise langs norskekysten vorte gjennomførte kvart einaste år, unnateke under dei to verdskrigane. Og sjølv om storparten av både skip og passasjerar kom frå andre land, har norske reiarlag ei sentral rolle i utviklinga av denne forma for skipsfart, både marknadsmessig og teknologisk.
Inntil for femti år sidan stod kombinerte passasjer- og lasteskip for storparten av cruisefarten. Men blant dei få unntaka finn me òg reindyrka flytande hotell under norsk flagg – mellom desse «Britannia», «Stella Polaris» og «Song of Norway», bygde i 1890, 1927 og 1970.
Eit stjerneskot
I 1890 vart Englandsruta Bergen-Newcastle-Trondheim opna av dei tre selskapa Bergenske, Nordenfjeldske og Halvorsens Linie. Bak det siste stod bergensreiaren P. G. Halvorsen, og til skilnad frå dei to hine sette han inn eit passasjerskip, «Britannia», som overgjekk alt som til den tid hadde kryssa Nordsjøen. Skipet var bygt i Bergen etter teikningar av Randulf Hansen, Noregs fremste skipskonstruktør, og var som ein stor lystyacht å sjå til: kvitt skrog med klipperbaug og gallionsfigur.
Dessverre finst det ingen kjende interiørbilete, men innreiinga stod i stil med eksteriøret; hovudsalongen vart samanlikna med atlanterhavsskip, og både salongen og lugarane hadde ei takhøgd på 2,7 meter. Fritz Thaulow og Nils Bergslien fekk store dekorative oppgåver om bord; «Britannia» var Noregs første flytande kunstgalleri. «Britannia» skulle ikkje berre bli det største og flottaste, men òg det snøggaste skipet i Nordsjøfart, med stor maskinkraft.
Digital tilgang – heilt utan binding
Prøv ein månad for kr 49.
Deretter kr 199 per månad. Stopp når du vil.
