Svimlande og jordnært
Thure Erik Lund opnar for det sjølvbiografiske og personlege i lett forkledning.
Thure Erik Lund ser langt inn i ei digital verd.
Per Anders Todal
Roman
Thure Erik Lund:
Identitet
Aschehoug
Eg er sjølv av småbrukarslekt frå ei øy på trøndelagskysten, men avstanden til Modum i Buskerud er ikkje større enn at eg kjenner meg igjen i outsiderrolla Lund plasserer forteljarstemmene sine i, enten det er alter ego som Thomas Olsen Myrbråten eller årets Hallandsås. Sidan eg i ein mannsalder har budd i nabokommunen Krødsherad, kjenner eg også igjen geografien, landskapet, dialekten og mentaliteten, eller gjæla, som Lund kallar det. Eg les bøkene hans i spennet mellom det å vere utanfor og innanfor på same tid, å vere ein framand i eigen familie, ein framand i bygda, samtidig som det er han som tar vare på bygdehistoria, ein arv han drar med seg frå faren Thure Lund som var ein markant lokalhistorikar i Modum.
Framtidsperspektiv
Ja vel, var det så enkelt, men så enkelt er det likevel ikkje, for Thure Erik Lund ser langt bortanfor det nære og inn i ei digitalisert verd der grensene mellom menneske, maskiner og natur blir flytande, han snakkar om teknologiske livsformer, verdsidear og ein tekststraum som berre går og går og blir hans eige liv, «jeg er jo uansett en digital variant av meg sjøl». Dermed blir også all identitet flytande ved at det verkelege blir kunstig og det kunstige blir verkeleg, og dette science fiction-aktige framtidsperspektivet har følgt med i Lunds forfattarskap sidan debuten i 1992.
Det er den nær 60-årige småbrukaren, snikkaren, boksamlaren og «mångsysslaren» Hallandsås som fører ordet. Han har slutta å publisere romanar, men han skriv framleis, isolert i bryggarhuset på bruket der han i årevis har jobba med ein tekststraum som ingen skal lese, og som truleg er den romanen som ligg føre i Identitet. Sambuaren Maria og dei to ungane bur i hovudhuset. Dei unngår kvarandre, snakkar ikkje saman, det er ein avstand mellom dei som er ei paradoksal form for kjærleik. For dei passar på kvarandre, spionerer på kvarandre, og når Maria går kveldsturane sine, kryp Hallandsås rundt i buskar og kratt og følgjer med, sjalu, komisk og med eit ironisk skråblikk. Verre er mistanken om at ho har brote seg inn i tekststraumen hans og driv og rettar, skriv om og legg til, slik at han ikkje kjenner seg igjen i sitt eige verk. Det er ein forunderleg psykologi som driv fram denne ekteskaplege maktkampen.
Heimstaddikting
Identitet er ein tekst med mange forgreiningar. Éin ting er sivilisasjonskritikken og dei mange ironiske stikka til samtidslitteraturen, men eg set større pris på dei sjølvbiografiske innslaga der Lund på herleg vis skriv om snikring og skriving, og der han med ein keitete, distansert varme skriv om foreldra og slekta. I forlenginga av dette tar han med namns nemning eit oppgjer med dei som rundt tusenårsskiftet skulda han for nazisme. Det har nok plaga Thure Erik Lund at faren, Thure Lund, under og etter krigen fekk rykte på seg som stripete ved å bryte idrettsstreiken og ved å livnære seg som lensmannsbetjent. I røynda rapporterte han til motstandsrørsla i Modum, der Osvald-gruppa var ein del av bildet.
Lunds varemerke er det utopiske, burleske og særmerkte i språk og innhald. Lund tar lesaren inn i svimlande perspektiv samtidig som han leverer heimstaddikting av ypparste merke, og når han på originalt vis avsluttar Identitet med 20 sider av Identitet, andre bok, kan ein vente meir om denne samansette, ustabile og originale Hallandsås, som lever i randsona av det normale.
Det er berre å gle seg.
Oddmund Hagen
Oddmund Hagen er forfattar og fast bokmeldar i Dag og Tid.
Er du abonnent? Logg på her for å lese vidare.
Digital tilgang til DAG OG TID – heilt utan binding
Prøv ein månad for kr 49.
Deretter kr 199 per månad. Stopp når du vil.
Roman
Thure Erik Lund:
Identitet
Aschehoug
Eg er sjølv av småbrukarslekt frå ei øy på trøndelagskysten, men avstanden til Modum i Buskerud er ikkje større enn at eg kjenner meg igjen i outsiderrolla Lund plasserer forteljarstemmene sine i, enten det er alter ego som Thomas Olsen Myrbråten eller årets Hallandsås. Sidan eg i ein mannsalder har budd i nabokommunen Krødsherad, kjenner eg også igjen geografien, landskapet, dialekten og mentaliteten, eller gjæla, som Lund kallar det. Eg les bøkene hans i spennet mellom det å vere utanfor og innanfor på same tid, å vere ein framand i eigen familie, ein framand i bygda, samtidig som det er han som tar vare på bygdehistoria, ein arv han drar med seg frå faren Thure Lund som var ein markant lokalhistorikar i Modum.
Framtidsperspektiv
Ja vel, var det så enkelt, men så enkelt er det likevel ikkje, for Thure Erik Lund ser langt bortanfor det nære og inn i ei digitalisert verd der grensene mellom menneske, maskiner og natur blir flytande, han snakkar om teknologiske livsformer, verdsidear og ein tekststraum som berre går og går og blir hans eige liv, «jeg er jo uansett en digital variant av meg sjøl». Dermed blir også all identitet flytande ved at det verkelege blir kunstig og det kunstige blir verkeleg, og dette science fiction-aktige framtidsperspektivet har følgt med i Lunds forfattarskap sidan debuten i 1992.
Det er den nær 60-årige småbrukaren, snikkaren, boksamlaren og «mångsysslaren» Hallandsås som fører ordet. Han har slutta å publisere romanar, men han skriv framleis, isolert i bryggarhuset på bruket der han i årevis har jobba med ein tekststraum som ingen skal lese, og som truleg er den romanen som ligg føre i Identitet. Sambuaren Maria og dei to ungane bur i hovudhuset. Dei unngår kvarandre, snakkar ikkje saman, det er ein avstand mellom dei som er ei paradoksal form for kjærleik. For dei passar på kvarandre, spionerer på kvarandre, og når Maria går kveldsturane sine, kryp Hallandsås rundt i buskar og kratt og følgjer med, sjalu, komisk og med eit ironisk skråblikk. Verre er mistanken om at ho har brote seg inn i tekststraumen hans og driv og rettar, skriv om og legg til, slik at han ikkje kjenner seg igjen i sitt eige verk. Det er ein forunderleg psykologi som driv fram denne ekteskaplege maktkampen.
Heimstaddikting
Identitet er ein tekst med mange forgreiningar. Éin ting er sivilisasjonskritikken og dei mange ironiske stikka til samtidslitteraturen, men eg set større pris på dei sjølvbiografiske innslaga der Lund på herleg vis skriv om snikring og skriving, og der han med ein keitete, distansert varme skriv om foreldra og slekta. I forlenginga av dette tar han med namns nemning eit oppgjer med dei som rundt tusenårsskiftet skulda han for nazisme. Det har nok plaga Thure Erik Lund at faren, Thure Lund, under og etter krigen fekk rykte på seg som stripete ved å bryte idrettsstreiken og ved å livnære seg som lensmannsbetjent. I røynda rapporterte han til motstandsrørsla i Modum, der Osvald-gruppa var ein del av bildet.
Lunds varemerke er det utopiske, burleske og særmerkte i språk og innhald. Lund tar lesaren inn i svimlande perspektiv samtidig som han leverer heimstaddikting av ypparste merke, og når han på originalt vis avsluttar Identitet med 20 sider av Identitet, andre bok, kan ein vente meir om denne samansette, ustabile og originale Hallandsås, som lever i randsona av det normale.
Det er berre å gle seg.
Oddmund Hagen
Oddmund Hagen er forfattar og fast bokmeldar i Dag og Tid.
Lund tar lesaren inn i svimlande perspektiv samtidig som han leverer heimstaddikting av ypparste merke.
Fleire artiklar
Jeffrey Wright spelar rolla som forfattaren Thelonious «Monk» Ellison.
Foto: Prime Video
Moro for middelklassen
Den er ikkje tung på labben, American Fiction, som gjer det veldig lett å le.
Gjengkrim – ein varsla katastrofe
Det går knapt ein dag utan grove valdshendingar i Oslo. Bak står gjengar og mektige kriminelle nettverk som har vakse fram dei siste ti åra.
Palestinarar på veg ut av Rafah måndag, etter at Israel varsla nye åtak i byen lengst sørvest i Gaza.
Foto: Ramadan Abed / Reuters / NTB
Den raude streken i Rafah
Kanskje skal sluttspelet i Gaza-krigen stå i Rafah. Det blir neppe kort.
For Balázs Orbán, som er politisk rådgjevar for statsministeren, er jobben å halda fast ved dei langsiktige måla til regjeringa mellom alle dei mindre og større oppgåvene i kvardagen.
Foto frå heimesida til Orbán Balázs i regjeringa
Verda ifølgje Orbán
BUDAPEST: I ei ny bok fortel ideologen til Viktor Orbán korleis Ungarn vil utfordra den liberale verdsordninga. Weekendavisen har møtt han.
29 år gamle Jordan Bardella leier det franske høgrepopulistiske partiet Rassemblement National – som omsett til norsk vert Nasjonal samling. Det ligg an til å verte det største partiet i Frankrike ved EU-valet om ein månad. Biletet er frå eit valkampmøte i Perpignan, sør i Frankrike, 1. mai.
Foto: Manon Cruz / Reuters
Eit Europa i mørkare blått
Partia ytst til høgre ligg an til å styrkje stillinga si i Europaparlamentet ved valet om ein månad. Men dei kjem ikkje til å få stor politisk makt, ifølgje diplomat og forskar Sverre Jervell.