Bjørg Vik (1935–2018)Forfattaren Bjørg Vik drog til felts mot mønster og haldningar som kveler kvinner og forkvaklar menn. Ho debuterte i 1963 med novellesamlinga
Forfattar Bjørg Vik.
Foto: Bjørn Berg / NTB scanpix
Forfattaren Bjørg Vik drog til felts mot mønster og haldningar som kveler kvinner og forkvaklar menn. Ho debuterte i 1963 med novellesamlinga Søndag ettermiddag, og er ein stor forfattar, med noveller, romanar og fleire skodespel. To akter for fem kvinner var ein teatersuksess på 70-talet. Ho er omsett til mange språk og heidra med mange prisar.
Kvinne- og samfunnsengasjementet gjorde henne til aktivist, særleg takk vera henne kom feministbladet Sirene ut med sitt første nummer i 1973. Cappelen forlag gav ut bøkene hennar, og da ho gjekk til forlagssjef Henrik Groth med ideen om Sirene, skjønte han at med henne i redaksjonen og kvinnerørsla i full utvikling var dette noko forlaget kunne støtte.
Vi var seks kvinner som arbeidde fram Sirene. I pakt med tidsånda hadde vi flat struktur, redaktøransvaret gjekk på omgang. Men det er ingen tvil om at Bjørg Vik var den som ofte sette dagsordenen – på ein bestemt, iblant skarp, iblant humoristisk måte. Vi var ein livleg gjeng. Sterke meiningar, latter, sinne og kjærleik kom til uttrykk både på redaksjonsmøte og i bladet. Vi tok fatt i tema som aviser og vekeblad ikkje brydde seg om eller ikkje ville ta i. Vi var ein suksess frå første nummer i 1973, salstala gjekk opp til 35.000.
Bjørg Vik hadde ein bakgrunn som gjorde at ho forstod kva jenter og kvinner hadde å stri med. I eit intervju eg hadde med henne i Sirene i 1977, da ho gjekk ut av redaksjonen for å samle seg om forfattarskapen, fortel ho om ein krokete veg mot først å bli journalist, deretter forfattar. Ho fekk jobb i Porsgrunn Dagblad. Men så kom det barn, barnehagar fanst ikkje.
«Da eg hadde vore husmor eit par år, tok eg til å bli smådesperat. (...) Eg fekk ei avtale med den gamle avisa mi om å lage laurdagsintervju kvar veke. For dei pengane løna eg eit menneske tre formiddagar i veka. Da låste eg døra til soverommet, putta sov-i-ro i øyrene og drog for gardinene. Den fyrste dagen brukte eg til laurdagsintervjuet, dei to neste til å dikte!»
Ho gav oss tidleg uvante møte med den erotisk aktive kvinna, direkte og uredd skildra. Ho seier at det var hennar eigne røynsler, saman med alt det som skjedde i 60-åra, år prega av sterke krefter som var både frigjerande og oppløysande.
Digital tilgang – heilt utan binding
Prøv ein månad for kr 49.
Deretter kr 199 per månad. Stopp når du vil.
