1. Nynorskordboka er den ordboka eg brukar aller mest. På ordbok.uib.no kjem det opp eit verktøy der du kan velja nynorsk, bokmål eller begge, og klikkar du på ordklassesymbolet, kjem alle bøyingsformer opp. Dette får me heilt gratis, fordi staten ved Språkrådet og Universitetet i Bergen ajourfører ordboka og lèt oss få tilgang – via pc og mobilapp. Slike gode kan me få når me bur i ein velferdsstat!

2. Med andre ord er Magne Rommetveits verk med framlegg til nynorske alternativ for bokmålsord og -uttrykk. Står du fast når du møter ordet «betinget», er det berre å slå opp i Med andre ord, som gir deg forklaringar og døme i fleng. Rettnok er ordboka strengare enn det som er vanleg i nynorsk i dag, men me har ikkje vondt av det, sjølv om det no er opna for mange an-, be- og heit-ord i nynorsk.

3. Norsk Ordbok er eit verk på tolv band som har det meste om norske dialektord. I 1993 laga eg ei dialektordbok frå heimbygda mi, Gjesdal. Den gongen trudde eg at enkelte dialektord var så spesielle at dei ikkje fanst på nynorsk. Men trur du ikkje at Norsk Ordbok hadde både /liga hållen/ (like hollen) og /hibnaleide/ (himmelleite), som Ivar Aasen etter familietradisjonen skal ha skrive ned på Søyland?

Aud
Søyland